ԵՐԵՎԱՆ, 27 օգոստոսի — Sputnik. Պատմաճարտարապետական 7 կառույցի տրվել է թանգարանային կարգավիճակ, դպրոցներում ներդրվել է մշակութային օջախների այցելության աբոնեմենտային համակարգ, որը կգործի հոկտեմբերից, վերանայվել և նվազեցվել են մշակութային դահլիճների վարձավճարները, դպրոցներում ներդրվել է «Քո արվեստը» ծրագիրը, Հայֆիլմի ժառանգությունը հանձնվել է ազգային կինոկենտրոնին, մշակույթի նախարարությունը միջամտել և կանխել է 32 հուշարձանին սպառնացող վտանգը:
Այսօր, լրագրողների հետ հանդիպմանը, ներկայացնելով իր 100-օրյա աշխատանքի հիմնական ուղղությունները, նշեց ՀՀ մշակույթի նախարար Լիլիթ Մակունցը:
Բացի այդ, նրա խոսքով, դադարեցվել են «Հին Երևան» նախագծում ներառված հուշարձանների ու դրանց տարածքում իրականացվող անօրինական շինաշխատանքները, մասնավորապես` Արամի 32 հասցեին տրված շինթույլտվությունը չեղյալ է համարվել:
«Չնայած աշխատանքային շատ ծանրաբեռնված ու խիտ գրաֆիկին, ես անընդհատ ինչ-որ բան չհասցնելու մտավախություն եմ ունենում»,- խոստովանեց նախարարն ու հավելեց, որ ամեն ինչ անում է իրեն վստահված ոլորտում տարիներով կուտակված հարցերը լուծելու համար:
Մակունցի խոսքով` անցած 3 ամսում մշակվել է նաև առաջիկա 5 տարիների մշակութային ոլորտի զարգացման ռազմավարությունը, նախանշվել են մշակույթի նախարարության կառուցվածքային բարեփոխումներ:
30 մլն դրամ է հատկացվել Գյումրու Ամենափրկիչ եկեղեցու վերջնական շինաշխատանքների ֆինանսավորման և դրա բացումն այս տարի դեկտեմբերի 7-ին իրականացնելու համար: Բայցի այդ Գյումրիում նախատեսվում է բացել ազգային ստեղծարար կինոկենտրոն, որի ղեկավարությունը վստահվելու է Դավիդյան եղբայրներին:
«Մենք ամեն ինչ անելու ենք, որ մինչև այս տարվա վերջ ընդունվեն կինոյի և թանգարանների մասին օրենքները: Դրանք արդեն պատրաստի փաթեթներ են և քննարկման փուլում են: Բայց դիմելու ենք նաև միջազգային կառույցներին` միջազգային ներդրողներ ներգրավելու համար»,- անդրադառնալով հայկական կինոարվեստի զարգացման հեռանկարներին, ասաց նախարարը:
Բացի այդ ՌԴ կատարած այցի շրջանակներում Մակունցը պայմանավորվածություն է ձեռք բերել Հայ-ռուսական կինոֆոնդի ստեղծման շուրջ, որի շնորհիվ կծնվեն ոչ միայն հայ-ռուսական նոր կինոգործեր, այլև կապահովվի դրանց ներկայացումը Հայաստանում, Ռուսատանում ու արտերկրում:
Հայկական օպերայի շուրջ ստեղծված իրավիճակը ևս դուրս չի մնացել մշակույթի նախարարի 100-օրյա աշխատանքի ուշադրությունից: Օպերային գործիչները նախարարի հետ հանդիպմանը բազմաթիվ խնդիրներ են ներկայացրել: Մակունցը դրանք ներկայացրել է Սպենդիարյանի անվան օպերայի եւ բալետի ազգային ակադեմիական թատրոնի տնօրեն Կոնստանդին Օրբելյանին, ինչպես ինքը նշեց` բառացի, բայց առանց աղբյուրը բացահայտելու:
«Այժմ սպասում ենք արմատական փոփոխությունների առաջարկներին: Դրանց ծանոթանալուց հետո կորոշենք, թե ինչ քայլեր կձեռնարկենք և անհրաժեշտ են արդյոք արմատական փոփոխություններ»,- ասաց նախարարը` անդրադառնալով օպերայի ղեկավարության փոփոխության մասին լրագրողների բարձրացրած հարցին:
Ապագայի ծրագրերի թվում Լիլիթ Մակունցը նշեց նաև, որ պայմանավորվածություն է ձեռք բերվել Նյու Յորքի մետրոպոլիտենում հայկական հուշարձանների ցուցադրություն կազմակերպելու շուրջ:
