ԵՐԵՎԱՆ, 27 օգոստոսի — Sputnik. Ի տարբերություն ԽՍՀՄ-ի, Հայաստանում մրգերի ու բանջարեղենի սելեկցիայի պրակտիկա չկա։ Այս մասին այսօր լրագրողներին ասաց «Սպառողների միության» նախագահ Արմեն Պողոսյանը
Կորսված օգտակար ավանդույթների մասին ակտիվորեն հիշում են հատկապես այն ժամանակ, երբ խոսում են լոլիկների արտադրության մասին։ Պողոսյանն ընդգծեց, որ դա անհիմն չէ։
«Ինչի՞ համար ենք լոլիկ գնում։ Իհարկե, ոչ պատեր կառուցելու համար։ Դրա համար շինանյութեր գոյություն ունեն։ Իսկ լոլիկը գնում ենք ուտելու համար։ Այդ պատճառով ես երբեմն կեսկատակ-կեսլուրջ խորհուրդ եմ տալիս ստուգել լոլիկները` պատին խփելով», — ավելացրեց Պողոսյանը։
Փորձագետը ցավում է, որ պետությունը բավարար չափով գումար չի հատկացնում նախկին տեսակների պահպանման ու նոր տեսակների ստեղծման համար։ Ոլորտի ինստիտուտները (հողագործության, նաև պտղաբուծության ու խաղողագործության) նվազագույն ֆինանսավորում են ստանում։
«Հենց սելեկցիոներների աշխատանքը կարող է լոլիկների և այլ բանջարեղենի հին տեսակներն ավելի կայուն դարձնել վնասատուների հանդեպ` միաժամանակ պահպանելով համային բոլոր հատկությունները, որոնք հայտնի են նաև մեր երկրի սահմաններից դուրս», —ընդգծեց Պողոսյանը։
Նշենք` խորհրդային տարիներին ոլորտի գիտահետազոտական ինստիտուտներն ամբողջ հանրապետության տարածքում փորձառու մասնագետներ ունեին, որոնք տեսակները փորձարկում էին տարբեր կլիմայական գոտում։ Հիմա նրանք միայն մեկ-երկու տարածք ունեն Արարատյան դաշտում։
