ԵՐԵՎԱՆ, 25 օգոստոսի — Sputnik. Գերմանիայի կանցլեր Անգելա Մերկելը, որն այսօր Երևանից Բաքու է մեկնել, Instagram-ի իր էջում մի տեսանյութ է հրապարակել, որում երևում է Երևանի կենտրոնը` Արարատի ֆոնին։ Բայց, չգիտես ինչու, տեսանյութին կից գրառման մեջ նա նշել է, որ դա Ադրբեջանն է։
«Բարի լույս Ադրբեջանից»,- տեսանյութին կից գրել է Մերկելը։
Վստահ ենք, որ սա շփոթմունք է, բայց չգիտես ինչու, հիշեցնում է Ադրբեջանի նախագահ Իլհամ Ալիևի` «ադրբեջանցիներին իրենց պատմական հայրենիք` Էրիվան վերադարձնելու» հայտարարությունը։
Հիշեցնենք, որ Անգելա Մերկելի տարածաշրջանային այցը մեկնարկել է օգոստոսի 23-ին Թբիլիսիից։ Երեկ նա Երևան էր ժամանել։ Պաշտոնական դիմավորումից հետո Գերմանիայի կանցլերն այցելել էր Ծիծեռնակաբերդ, ապա «Թումո» կենտրոն։
Մերկելի պատվիրակության կազմում ընդգրկվել էին կանցլերի` արտաքին քաղաքականության և անվտանգության հարցերի խորհրդական Յան Հեքերը, Ֆինանսական և տնտեսական քաղաքականության գծով խորհրդական Լարս-Հենդրիկ Ռյոլլերը, եվրոպական քաղաքականության գծով խորհրդական Ուվե Կորզեպիուսը, կանցլերի աշխատակազմում Հարավային Կովկասի բաժնի ղեկավար Մաթիաս Լյութենբերգը։
Գերմանիայի կանցլերն այժմ Բաքվում է։
