Ռեպորտաժների անհաջող դուբլերը համացանցի վիրուսային տեսանյութերի ամենածիծաղելի ձևաչափերից է։ Հաճախ պատահական անցորդները բավականին սրամիտ են լինում ու խենթ բաներ են անում կադրերում։ Բայց ոչ այս տեսանյութում։
Լուրջ դեմքով ռեպորտաժ նկարահանող իտալացի հաղորդավարն իր համար աշխատում էր։ Հանկարծ անկյունից փչովի բանանով տղամարդ «ծլեց»։ Համաձայնեք` բավականին տարօրինակ տեսարան է։ Հավանաբար, տեսահոլովակի հերոսն էլ էր այդպես կարծում ու որոշել էր իր բանանի շնորհիվ հանրահայտ դառնալ։
«Չարագործին» չբավարարեց ուղղակի կադրում հայտնվելը։ Նա որոշեց հունից հանել լրագրողին` նրա դեմքին բանանով թեթև հարվածելով։ Նկատելով, որ զուսպ տղամարդը չի արձագանքում իր սադրանքներին, անցորդը փոխեց իր մարտավարությունն ու սկսեց բանանով շոյել խեղճ իտալացու գլուխը։
Եվ ահա տաքարյուն հաղորդավարը խլեց բանանն ու դրանով ծեծեց անցորդին։ Բայց վերջում արդարությունը հաղթեց. համառ «բանանակիրը» ծեծվեց ու հեռացավ։
