ԵՐԵՎԱՆ, 23 օգոստոսի — Sputnik. ՀՀ հարկային ծառայությունը ստուգում է բոլոր սուպերմարկետները, ոչ թե միայն «Երևան սիթին»։ Այս մասին այսօր կառավարության նիստից հետո ասաց Պետեկամուտների կոմիտեի նախագահ Դավիթ Անանյանը։
Ավելի վաղ վարչապետ Նիկոլ Փաշինյանի ընդդիմախոսներն ասում էին, որ նոր իշխանությունը ստուգում է միայն այն անձանց սուպերմարկետները, որոնք կապված են նախկին իշխանության հետ, իսկ հիմնական ստուգումներն անցկացվել են պատգամավոր ու գործարար Սամվել Ալեքսանյանի «Երևան սիթի» սուպերմարկետներում։
Վաճառքի այլ կետերում էլ են ստուգումներ իրականացվում։ Հարցին, թե երբ Նիկոլ Փաշինյանը պատգամավոր էր, ասում էր, որ ԱԺ պատգամավոր Սամվել Ալեքսանյանը շաքարավազի հումքի անվան տակ պատրաստի շաքարավազ է ներկրում և բարձր գնով վաճառում, արդյոք նման ստուգումներ եղել են, ՊԵԿ նախագահն ասաց. «Այդ տեղեկությունները ստուգվել են, և վերջին մեկ տարվա կտրվածքով նման դեպք չի եղել, նախկինները ստուգված ժամանակահատված են եղել,դրանք չեն ստուգվել: Վերսկսումների իրավական հիմք էլ մենք չունենք»,- ասաց նա:
Մայիսին հանրապետության սուպերմարկետներում ստուգել են հարկային ռեժիմը։ Պարզվել է` շատերը մրգերն ու բանջարեղենը (նաև այլ մթերքները) վաճառել են փոքր բիզնեսի համար նախատեսված ցածրացրած հարկային դրույքով և իրենց վաճառականներին որպես անհատ ձեռներեցներ են ձևակերպել։
Անանյանը նշեց, որ սուպերմարկետներն այժմ այդպիսի բան թույլ չեն տալիս։
