ԵՐԵՎԱՆ, 23 օգոստոսի — Sputnik. Գերմանիայի կանցլեր Անգելա Մերկելի այցը Հայաստան, Վրաստան ու Ադրբեջան վկայում է, որ Բեռլինն ակտիվանում է հարավկովկասյան ուղղությամբ։ Քաղաքական գործիչ Ստեփան Սաֆարյանի կարծիքով` Գերմանիան տևական ժամանակ հեռացել էր Արևելքի, մասնավորապես Հարավային Կովկասի գործընթացներից։
Հիմա իրավիճակը հետզհետե փոխվում է, ու այս վերանայմանը մեկնարկ է տրվել 2016 թվականի հունիսին, երբ Բունդեսթանգն իր բանաձևով ճանաչեց ու դատապարտեց Հայոց ցեղասպանությունը։ Սաֆարյանի կարծիքով` այդ ժամանակից ակնհայտ դարձավ, որ սարերի հետևում չէ Բեռլինի «ինտերվենցիան» այդ տարածաշրջանում։
Միաժամանակ Սաֆարյանն ուշադրություն դարձրեց, որ Մերկելի հետ հանդիպմանը նախորդեց հանդիպումը Ռուսաստանի նախագահ Վլադիմիր Պուտինի հետ։ Փորձագետը չի բացառում, որ նաև կովկասյան հարցեր են քննարկվել։
«Կարծում եմ` չնայած իր ակտիվացմանը, Գերմանիան չի դիպչի Ռուսաստանի շահերին», — այսօր մամուլի ասուլիսի ընթացքում ասաց Սաֆարյանը։
Ինչ վերաբերում է հայ-գերմանական հարաբերությունների ձևաչափին, Սաֆարյանը կարծում է, որ զարգացման ու խորացման զգալի չօգտագործված ներուժ կա։ Գերմանիան ԵՄ-ի տնտեսական ու քաղաքական հսկան է. գերմանական կապիտալը ներկայացված է Հայաստանի տնտեսության առանցքային ոլորտներում, Բեռլինը բավականին զգայուն է ժողովրդավարության ու մարդու իրավունքների խնդրի նկատմամբ։
«Հայաստանում տեղի ունեցած քաղաքական փոփոխությունները համագործակցության նոր հորիզոններ են բացում։ Մերկելի ու Փաշինյանի բանակցությունները կնշանավորեն հարաբերությունների որակական նոր փուլը»,- ենթադրեց Սաֆարյանը։
Փորձագետ Նարեկ Մինասյանն էլ իր հերթին նշեց, որ Եվրամիությունում Գերմանիայի քաղաքական կշիռը կարևոր է Հայաստանի համար մի քանի խնդիրների լուծման առումով։ Նա հիշեցրեց, որ ժամանակին Գերմանիայի վետոն լուրջ խոչընդոտ էր Վրաստանի համար վիզային ռեժիմի չեղարկման գործում։ Այդ վետոն հաղթահարելու համար Թբիլիսին ստիպված էր մեծ ջանքեր գործադրել։
Հաշվի առնելով այդ նախադեպը` Մինասյանը կարծում է, որ Հայաստանի ղեկավարությունը պետք է Բեռլինի հետ որակապես այլ հարաբերություններ կառուցել` հետագայում Գերմանիայի աջակցությունը ստանալու նպատակով։
