ԵՐԵՎԱՆ, 21 օգոստոսի — Sputnik, Լաուրա Սարգսյան. Մայրաքաղաքի գլխավոր տոնը` Երևանի 2800-ամյակը, անպայման տեղի կունենա։ Այս մասին Sputnik Արմենիայի թղթակցի հետ զրույցում ասաց ՀՀ փոխվարչապետի խորհրդական Գեորգի Մուրադյանը։
Ավելի վաղ որոշվել էր, որ այս տարի Երևանի հիմնադրման 2800-ամյակին նվիրված «Էրեբունի-Երևանի» միջոցառումները պետք է անցկացվեին սեպտեմբերի 29-30-ը։ Սակայն Հայաստանում ներքաղաքական փոփոխություններից, ինչպես նաև Երևանի քաղաքապետ Տարոն Մարգարյանի հրաժարականից հետո բնակչության շրջանում սկսեցին լուրեր պտտվել, որ այդքան սպասված տոնը չի կայանալու։
«Տոնակատարությունն անպայման տեղի կունենա, սակայն ժամկետները, հասկանալի պատճառներով, կտեղաշարժվեն», — պարզաբանեց Մուրադյանը։
Նրա խոսքով` տոնակատարությունների համար օպտիմալ ժամանակը հոկտեմբերի 19-20-ն է։ Դա պայմանավորված է այն հանգամանքով, որ Երևանում հոկտեմբերի 11-12-ը լայնածավալ միջոցառումներ են անցկացվելու, որոնք նվիրված են լինելու Ֆրանկոֆոն երկրների կառավարությունների ղեկավարների 17-րդ գագաթնաժողովի անցկացմանը։ Միևնույն ժամանակ հոկտեմբերի 27-ը ևս հարմար չէ, քանի որ հայկական օրացույցում սգո օր է։ Սեպտեմբերի վերջին էլ նախատեսված են Երևանի քաղաքապետի ընտրությունները։
«Ամենաօպտիմալ ժամկետը հոկտեմբերի 19-20-ն է, սակայն դեռ պետք է հաստատվի կառավարության նիստում», — ասաց Մուրադյանը։
Նրա խոսքով` այս հարցում ամենակարևորն այն է, որ տոնակատարությունից առաջ Երևանը քաղաքապետ ունենա և ձևավորվի Ավագանին։ Նա նաև վստահեցրեց, որ տոնն անպայման մեծ շուքով է նշվելու։
Առայժմ հայտնի է, որ միջոցառումներ են անցկացվելու Էրեբունի ամրոցում և Հանրապետության հրապարակում։
«Հյուրերի ցանկը դեռ պարզ չէ, քանի որ, իմ կարծիքով, հրավերը պետք է նորից ուղարկի նորանշանակ քաղաքապետը», — պարզաբանեց Մուրադյանը։
Այս տարի հոբելյանական ամսաթվի հետ կապված միջոցառումների լայնածավալ օրակարգ էր նախատեսված։ Հայաստան պետք է գային Երևանի քույր քաղաքների և սփյուռքի նեայացուցիչները։
Հիշեցնենք` Էրեբունին (Երևանը) մ.թ.ա. 782 թվականին հիմնադրել է Արգիշտի Առաջինը Հայկական լեռնաշխարհի հարավ-արևելքում։ Երևանն Առաջին Հանրապետության մայրաքաղաք է հռչակվել 1918 թվականի մայիսի 28-ին։ Քաղաքի օրը` Էրեբունի-Երևանը, նշվում ամեն տարի հոկտեմբերի կեսերին` սկսած 1968 թվականից։
