ԵՐԵՎԱՆ, 17 օգոստոսի — Sputnik. Հայաստանն ու Ռուսաստանը միայն զարգացնելու են հարաբերությունները։ Այսօր Հանրապետության հրապարակում այս մասին հայտարարեց ՀՀ վարչապետ Նիկոլ Փաշինյանը։
«Վերջին շրջանում ինչ ասես չեն խոսել հայ-ռուսական հարաբերությունների մասին ։ Այսօր ՀՀԿ ներկայացուցիչներից մեկը համարյա արցունք էր թափում, թե ինչքան վատ են հայ-ռուսական հարաբերությունները։ Ինչպես արևմուտքի, այնպես էլ Ռուսաստանի մեր գործընկերները դեռ նոր իրավիճակը ամբողջությամբ չեն գնահատել։ Եվ այսօր խոսել հայ-ռուսական հարաբերությունների` վատ լինելու մասին ուղղակի ծիծաղելի է»,- ասաց նա։
Փաշինյանը հիշեցրեց, որ այս ընթացքում երկու անգամ հանդիպել է ՌԴ նախագահ Պուտինի հետ և երեք անգամ ունեցել է հեռախոսազրույց։
«Կարող եմ ասել, որ հայ-ռուսական հարաբերություններ ոչ միայն վատ չեն, այլև լավ են և գնալով ավելի ու ավելի լավանալու են։ Մենք ասել ենք, որ արտաքին քաղաքական ռևերսներ չեն լինելու, մեր քաղաքականությունը, մեր նպատակներից մեկը հայ-ռուսական բարեկամությունը խորացնելն է, նոր մակարդակի բարձրացնելը։ Երեք ամիս առաջ ես խոստանում էի, որ հայ-ռուսական հարաբերություններն անցնելու են նոր մակարդակի»,- ասաց նա։
Փաշինյանը խոստացավ, որ շուտով հայտնի կդառնա նաև հայ-ռուսական հումանիտար նախագծի մասին, որը, նրա խոսքով, աննախադեպ է մեր նորանկախ երկրի պատմության մեջ։
«Դա լինելու է կոնկրետ ապացույցը, որ մենք գնում ենք մեր հարաբերությունները նոր մակարդակի բարձրացնելու ուղղությամբ»,- շեշտեց նա։
Փաշինյանը վստահեցրեց` Հայաստանը ոչ մի տեղ չի գնում, ամուր կանգնած է իր ոտքերի վրա, ուղիղ ողնաշարով, հայ-ռուսական ռազմավարական բարեկամությունը խորանալու է և զարգանալու։ Նա ավելացրեց, որ Հայաստանը զարգացնելու է հարաբերությունները նաև ԵՄ-ի հետ։
