ԵՐԵՎԱՆ, 15 օգոստոսի — Sputnik, Արմենուհի Մխոյան. Գյումրիում ավարտին է մոտենում Շիրազի փողոցի վերջնամասում (Ջիվանի 79) գտնվող և ՀՀ նախկին վարչապետ Կարեն Կարապետյանի անվան հետ կապվող երկհարկանի կառույցի հիմնանորոգման աշխատանքները։
«Արդեն տեղադրվել են պատուհանները: Շուտով մեկնարկելու են վերջնական` ներքին հարդարման աշխատանքները»,- Sputnik Արմենիային այս մասին տեղեկացրեց Գյումրու գլխավոր ճարտարապետ Հենրիկ Գասպարյանը:
Գասպարյանի խոսքով` աշխատանքները նախատեսված են ավարտել մինչև տարեվերջ:
Sputnik Արմենիայի հարցին, թե երկհարկանի կառույցն ի վերջո ինչի է վերածվելու՝ գինետա՞ն, հյուրանոցի՞, թե՞ ռեստորանի, Գասպարյանը պատասխանեց. «Ավելի շուտ ռեստորանային համալիրի՝ «Ֆլորենս»»:
Նշենք, որ Գյումրու պատմական «Կումայրի» արգելոցի տարածքում գտնվող նախկին «Ջրահարս» ռեստորանը նախկին իշխանությունների մեկնարկած «Կումայրի» պատմական կենտրոնի զարգացման ծրագրի առաջին ծիծեռնակն էր: ՀՀ նախկին վարչապետ Կարեն Կարապետյանի ընտանիքը 500 հազար դոլար ներդրում էր արել Շիրակի սոցիալ-տնտեսական զարգացման ծրագրի համար բացված ֆոնդին։ Նախկին վարչապետի ներդրմամբ ձեռք էր բերվել այս կառույցը:
