ԵՐԵՎԱՆ, 15 օգոստոսի — Sputnik. «Հանուն ազգի յուրաքանչյուրիս քայլը» նախաձեռնությունը միջոցառումների շարք է կազմակերպում, որոնք ուղղված են Հայաստանում ԼԳԲՏ–քարոզչությունը դադարեցնելուն։ Այս մասին Sputnik Արմենիայի թղթակցի հետ զրույցում հայտնեց նախաձեռնության ղեկավար Հրայր Կոստանյանը։
Վերջին շրջանում Հայաստանում միանգամից մի քանի սկանդալ է տեղի ունեցել ԼԳՏԲ–համայնքի ներկայացուցիչների մասնակցությամբ։ Մայիսին Երևանի 34-ամյա բնակիչ Վահան Գրիգորյանը ձու էր նետել բրիտանացի երգիչ Էլթոն Ջոնի վրա (բաց հոմոսեքսուալ և ԼԳԲՏ–ի իրավունքների հայտնի պաշտպան), որը Երևան էր ժամանել իր ամուսնու` Դևիդ Ֆերնիշի հետ։
Օգոստոսին Սյունիքի մարզի Շուռնուխ գյուղում գյուղացիների մի խումբ ծեծի էր ենթարկել ԼԳՏԲ 10 ակտիվիստի, որոնք գիշերով խանգարել էին գյուղացիների անդորրը։
Իսկ նախօրեին` օգոստոսի 14-ին, Երևանում ԼԳԲՏ համայնքի ներկայացուցիչները ներխուժել են ոստիկանության բաժանմունք և մարմնական վնասվածքներ են հասցրել իրավապահներին։
«Հանուն ազգի յուրաքանչյուրիս քայլը» նախաձեռնության ներկայացուցիչները Հայաստանում ԱՄՆ դեսպանատան միջոցով անձամբ դիմել են Դոնալդ Թրամփին` նրան նամակ փոխանցելով, որում կոչ են անում «զսպել» դեսպան Միլսին, որը, ըստ իրենց, երկրում գեյ–քարոզչություն է տանում և միջամտում երկրի ներքին հարցերին։
«Եթե ՀՀ-ում ԼԳԲՏ համայնքի ներկայացուցիչներն ԱՄՆ քաղաքացիներ են, ապա հորդորում ենք վերջիններիս խիստ կարգապահության ենթարկել և հաշվի առնել, որ նրանք գտնվում են Հայաստանում, այլ ոչ թե եվրոպական այնպիսի մի երկրում, որտեղ ընտանիքի գաղափարը և բարոյական արժեքները ոչ մի կերպ չեն համընկնում հայերիս ապրելակերպի, ավանդույթների, դարերով պահպանվող սովորույթների, ծիսակարգերի, մտածելակերպի, ազգասիրության ավանդականության հետ», – գրված է նամակում։
Կոստանյանը հայտնեց, որ նմանատիպ ուղերձներ են փոխանցվելու Գերմանիայի և Մեծ Բրիտանիայի դեսպանատներ։ Սեռական փոքրամասնությունների դրոշները Մեծ Բրիտանիայի դեսպանատան շենքի վրա բարձրացնելով` այն հետզհետե երկրի ներկայացուցչությունից վերածվում է ԼԳԲՏ–համայնքի ներկայացուցչության, հայտնեց նա։
Ինչ վերաբերում է Գերմանիային, ապա ակտիվիստները կոչ են անում այդ երկրի կառավարությանը դադարեցնել սեռական փոքրամասնությունների հարցերով զբաղվող կազմակերպությունների ֆինանսավորումը։
Ակցիայի կուլմինացիան կլինի Երևանում ՀՀ նախագահի նստավայրի մոտ կազմակերպվող հավաքը։
Մայիսի 17-ին Մեծ Բրիտանիայի դեսպանատունը նշում էր հոմոֆոբիայի և տրանսֆոբիայի դեմ պայքարի միջազգային օրը և տեղադրել ԼԳԲՏ անձանց խորհրդանշող ծիածանագույն դրոշը։ Հայաստանում ԱՄՆ դեսպանատունը օգոստոսի սկզբին դատապարտել է Շուռնուխ գյուղում ԼԳԲՏ համայնքի ներկայացուցիչների մասնակցությամբ միջադեպը և հիշեցրել, որ պետությունը պատասխանատվություն է կտրում բոլոր բնակիչների անվտանգության համար։
«Մեղավոր» է նաև ՀՀ նախագահ Արմեն Սարգսյանը, քանի որ Էլթոն Ջոնին Երևան հենց նա էր հրավիրել։
