ԵՐԵՎԱՆ, 14 օգոստոսի — Sputnik. ՀԱՊԿ-ի գլխավոր քարտուղար Յուրի Խաչատուրովի հարցի շուրջ ձեռք բերված պայմանավորվածությունները սկզբում պետք է հաստատի Հավաքական անվտանգության խորհուրդը։ Այս մասին այսօր ճեպազրույցի ժամանակ ասաց Հայաստանի ԱԳՆ մամուլի քարտուղարի ժամանակավոր պաշտոնակատար Աննա Նաղդալյանը։
Ռուսաստանի նախագահ Վլադիմիր Պուտինն ու Ղազախստանի նախագահ Նուրսուլթան Նազարբաևը օգոստոսի 12-ին կայացած հանդիպման ժամանակ քննարկել են ՀԱՊԿ-ի գլխավոր քարտուղար Յուրի Խաչատուրովի հարցը։
«Մնացած քայլերը կքննարկվեն կազմակերպության շրջանակներում տարբեր մակարդակներով, պայմանավորվածությունները կներկայացվեն Հավաքական անվտանգության խորհրդի քննարկմանն ու հաստատմանը։ Մենք դեռ ավելացնելու բան չունենք, հասարակությանը տեղեկություն կտրվի բոլոր այս գործընթացների մասին», — ասաց Նաղդալյանը։
Նրա խոսքով` Հայաստանն իր հերթին արել է հնարավոր ամեն բան, որպեսզի ներքին հարցերը չանդրադառնան ՀԱՊԿ-ի գործերի վրա։
Հիշեցնենք` Խաչատուրովին մեղադրանք է առաջադրվել 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով, այն բանի համար, որ նա այլ անձանց հետ նախնական համաձայնությամբ տապալել է ՀՀ սահմանադրական կարգը:
Օգոստոսի 4-ին քննչական մարմինները թույլ են տվել Խաչատուրովին լքել երկիրը, և նա վերադարձել է ՀԱՊԿ գլխավոր քարտուղարի իր պարտականությունների կատարմանը։
Ներկա պահին հայկական կողմը քննարկում է գլխավոր քարտուղարին փոխարինելու հարցը։ Խաչատուրովը ՀԱՊԿ գլխավոր քարտուղար է նշանակվել 2017 թվականին, երեք տարի ժամկետով։
