ԵՐԵՎԱՆ, 14 օգոստոսի — Sputnik. Հայ Ազգային Կոնգրեսը հայտարարություն և կոչ է տարածել, որում Վերաքննիչ դատարանի երեկվա` Ռոբերտ Քոչարյանի ազատ արձակման որոշումը որակել է ապօրինի` կայացրած ինչ-ինչ ուժերի ազդեցության տակ։
«Դրան նախորդել են 46 պատգամավորների միջնորդությունը՝ ի պաշտպանություն Ռոբերտ Քոչարյանի, ինչպես նաև վերջինիս վերահսկողության տակ գտնվող լրատվամիջոցների կատաղի քարոզչությունը ներկայիս իշխանությունների դեմ։
Այս ամենը մենք համարում ենք ոչ այլ ինչ, քան նախկին ավազակապետական ռեժիմի ներկայացուցիչների, այլ կերպ ասած՝ հակահեղափոխական ուժերի կոնսոլիդացիայի արտահայտություն և հակապետական դավադրություն ժողովրդի դեմ»,–ասված է հայտարարության մեջ։
Ելնելով վերոգրյալից` հակահեղափոխական ուժերի ռևանշը խափանելու նպատակով Հայ Ազգային Կոնգրեսը իր բոլոր անդամներին և համակիրներին կոչ է անում միահամուռ մասնակցել օգոստոսի 17-ին Հանրապետության հրապարակում հրավիրված հանրահավաքին։
