ԵՐԵՎԱՆ, 13 օգոստոսի — Sputnik. Վրաստանում ձերբակալվել է մի տղամարդ, որը մի քանի տարի շարունակ փակի տակ է պահել իր երեխաներին Լենտեխի շրջանի Ռցխմելուրի գյուղում։ Այդ մասին հաղորդում են վրացական ԶԼՄ-ները` հղում անելով Վրաստանի ՆԳՆ մամուլի ծառայությանը։
Երեխաները (երեք որդի և հինգ աղջիկ) երբեք չեն գնացել կրթական հաստատություններ։ Այդպիսով հայրը` ձերբակալված Ամիրան Դևնոշզաշվիլին, ցանկացել է նրանց հեռու պահել «հասարակության կործանարար ազդեցությունից»։
Մեղմ ասած անսովոր ընտանիքին վրացի լրագրողները բացահայտել են դեռ 2018թ-ի հունվարին։ Ավագ դուստրն այդ պահին 21 տարեկան է եղել, կրտսեր որդին` յոթ։ Պարզվել է, որ առողջապահության նախարարության սոցիալական սպասարկման գործակալությունը Դևնոշզաշվիլի ընտանիքի մասին իմացել է 2011թ-ից, իսկ պետական հաստատության աշխատակիցները պնդել են, որ երեխաներին փակի տակ են պահում 2010թ-ից։
Գործակալության տվյալներով` 2011թ-ին դատարանը սահմանափակել է ծնողների իրավունքները, բայց չի կարողացել ամբողջությամբ ազատել երեխաներին այդօրինակ խնամակալությունից։ Նրանք չեն ենթարկվել ֆիզիկական բռնության և շատ կապված են եղել ծնողների հետ, ինչը բավարար հիմնավորում են համարել` նրանց ընտանիքից չհեռացնելու համար։
Երեխաների մայրն ունի բարձրագույն մանկավարժական կրթություն և ինքնուրույն է զբաղվում նրանց ուսուցմամբ։ Ընտանիքը համարվում է սոցիալապես անապահով և պետական նպաստ է ստանում։
Դևնոշզաշվիլուն ձերբակալել են մի քանի շաբաթ առաջ։ Հետաքննության ընթացքում Քութայիսիի քաղաքային դատարանը կալանքի տակ է պահում նրան։ Մեղադրյալը չի ընդունում իր մեղքը։
Նրա դեմ հարուցվել է քրեական գործ «հարկադրում» հոդվածով, ինչը պատժվում է տուգանքով կամ մինչև մեկ տարի ուղղիչ աշխատանքներով, կամ վեց ամսից մինչև երկու տարի տնային կալանքով, կամ մինչև մեկ տարի ազատազրկումով։
Ինչ վերաբերում է երեխաներին, ապա նրանք այժմ գտնվում են առողջապահության նախարարության սոցիալական գործակալների հսկողության տակ, և նրանց հետ աշխատում են հոգեբանները։
