ԵՐԵՎԱՆ, 13 օգոստոսի — Sputnik. Մոսկվայում 57 տարեկան հոր դաժան սպանության համար մեղադրվող Խաչատուրյան քույրերի գործը հասարակական լուրջ արձագանք է ստացել ինչպես Ռուսաստանում, այնպես էլ Հայաստանում։ «Կոմսոմոլսկայա պրավդան» դժոխային սպանությունից հետո որոշել է հիշեցնել մեկ այլ սարսափելի պատմություն։
Միխայիլ Խաչատուրյանի սպանության մասին հոդվածների մեկնաբանություններում, ինչպես նաև սոցիալական ցանցերում օգտատերերի մի մասն աջակցում է աղջիկներին, մյուս մասը պահանջում է առավելագույն պատժի ենթարկել հորը սպանելու համար։
«Ինչո՞ւ է ընտանեկան-քրեական հակամարտությունը նման արձագանք առաջացրել հասարակությունում։ Սա պատմություն է, որն առնչվում է բազում ընտանիքների», — նշում է հոդվածագիրը։
Նրա խոսքով` Ռուսաստանում և աշխարհում ամեն օր ընտանեկան բռնության հազարավոր դեպքեր են գրանցվում, և զոհերը հազվադեպ են կարողանում դուրս գալ այդ մղձավանջից։ Նման պատմություններից մեկը, երբ հոր հետ դուստրերի չստացված հարաբերություններն ավարտվել են ողբերգությամբ, գրանցվել է ԱՄՆ-ում։
Նշվում է, որ Խաչատուրյան քույրերի պաշտպանները համեմատում են այդ դեպքը 2008թ-ին ԱՄՆ-ում աղմուկ բարձրացրած Սայիդ քույրերի գործի հետ։ Զուգադիպությունները, իսկապես, շատ են, բացառությամբ վերջաբանի։
Յասեր Սայիդը ներգաղթյալ է եղել Եգիպտոսից, Նյու Յորքում տաքսու վարորդ է աշխատել, բայց միաժամանակ լայն կապեր է ունեցել և ինչ-որ ընդհատակյա գործեր ձեռնարկել։ Միխայիլ Խաչատրյանի նման նա մոլի հավատացյալի տեսք է ունեցել և զենք է սիրել։ Նա նույնպես ամուսնացել է իրենից շատ փոքր անչափահաս աղջկա հետ։
31-ամյա Յասերն ամերիկացի կնոջ` Պատրիսիայի հետ ծանոթացել է, երբ նա ընդամենը 14 տարեկան է եղել։ Պատրիսիայի աղքատ ընտանիքը բառացիորեն ազատվել է «ավելորդ ուտող բերանից»` նրան հանձնելով եգիպտացու ձեռքը։ Երիտասարդ կինն ունեցել է երեք երեխա` Իսլամը, Ամինան և Սառան։
Տղային` Իսլամին, հայրը ձեռք չի տվել, բայց աղջիկներին պարբերաբար ծեծել է և ոտնձգություններ կատարել նրանց հանդեպ։ Բացի այդ, հետևել է նրանց յուրաքանչյուր քայլին. գաղտնալսել է հեռախոսները, ստուգել նամակագրությունը և նույնիսկ հեռադիտակով հետևել նրանց զբոսանքին։
Նշվում է, որ Սայիդը ծրագրել է աղջիկներին տանել Եգիպտոս և աճուրդի հանել. ամուսնացնել նրա հետ, ով ավելի շատ գումար կառաջարկի։ Քույրերը փրկվելու համար մորը համոզել են փախչել մեկ այլ նահանգ, որտեղ ազգականներ են ունեցել։ Բայց ազատությունը երկար չի տևել։ Պատրիսիան զղջացել է և զանգահարել ամուսնուն։ Տղամարդն ասել է, որ ներել է աղջիկներին և կարոտում է նրանց։
Չնայած բողոքներին և հորդորներին` մայրն աղջիկներին տարել է հոր մոտ։ Այդ հանդիպումն ավարտվել է ողբերգությամբ. Յասերը երկու աղջիկներին սպանել է` հրացանով կրակելով նրանց գլուխներին։ Ամինան եղել է 18 տարեկան, Սառան` 17։
Հետաքննությունների դաշնային բյուրոն մինչև հիմա էլ փնտրում է Սայիդին։ Վարկածներից մեկի համաձայն` նա թաքնվել է Եգիպտոսում, մեկ այլ վարկածով էլ` նա շարունակում է տաքսի վարել Նյու Յորքում։
Խաչատուրյանի աղմկահարույց սպանությունը տեղի է ունեցել հուլիսի 27-ին Մոսկվայի հյուսիս-արևելքում։ Երեք քույրերը խոստովանել են, որ սպանել են իրենց հորը` Միխայիլ Խաչատուրյանին։ Հարցաքննության ժամանակ քույրերն ասել են, որ «իրենք վատ հարաբերություններ են ունեցել հոր հետ, քանի որ հայրը տարիներ շարունակ բարոյապես տանջել է նրանց»։ Մոսկվայի Օստանկինյան դատարանը օգոստոսի 2-ին կալանավորել է երեք քույրերին։
