ԵՐԵՎԱՆ, 13 օգոստոսի – Sputnik. Նախկին նախագահին քրեորեն հետապնդելու համար պետք է վստահ լինել ոչ թե 100%, այլ 150%։ Այս մասին այսօր լրագրողներին ասաց ՀՀԿ պատգամավոր, ԱԺ փոխխոսնակ Էդուարդ Շարմազանովը` մեկնաբանելով ՀՀ երկրորդ նախագահ Ռոբերտ Քոչարյանի օգտին արված պատգամավորների ստորագրահավաքը։
Շարմազանովը կարծում է, որ չտեսնված բան է, որ նախկին նախագահին հրավիրեն որպես վկա, հետո կես ժամվա մեջ ասեն՝ մեղադրյալ եք:
«Չեմ կարող ասել` սա Փաշինյանի պատվերն է։ Միգուցե որոշ իրավապահներ ուզում են հաճոյանալ իշխանությանը։ Բայց ակնհայտ է, որ նախկին իշխանությունների նկատմամբ քաղաքական ու անձնական միտում կա։ Մեկը կարող է ասել` վենդետա, վրեժխնդրություն, սա որակումների հարց է։ Փառք աստծու, մենք դեռ ապրում ենք ժողովրդավարական Հայաստանում, և դեռ կան պատգամավորներ ու գործիչներ, որոնք հանդգնում են գործող իշխանությունից տարբերվող կարծիք հայտնել», — ասաց Շարմազանովը։
Շարմազանովն ընդգծում է, որ դատավորների փոխարեն ոչ ոք չի կարող որոշել` մեղավոր է Ռոբերտ Քոչարյանը, թե ոչ. նա ավելացնում է, ով նախկին նախագահին առաջադրված մեղադրանքները ոչ լիարժեք են ու անլուրջ։
Հիշեցնենք` ՀՀ ԱԺ 45 պատգամավոր անձնական երաշխավորագիր էր ներկայացրել գլխավոր դատախազ Արթուր Դավթյանին ՀՀ երկրորդ նախագահ Ռոբերտ Քոչարյանի նկատմամբ կիրառված խափանման միջոցը փոխելու վերաբերյալ:
Հիշեցնենք նաև, որ Երևանի Ընդհանուր իրավասության դատարանի որոշմամբ Հայաստանի երկրորդ նախագահ Ռոբերտ Քոչարյանը երկու ամսով կալանավորվել է։ Նրան մեղադրում են Հայաստանի սահմանադրական կարգը տապալելու մեջ։ Վիկտոր Սողոմոնյանը Ռոբերտ Քոչարյանի կալանավորումը վենդետա է համարում։
Նման մեղադրանք է ներկայացվել նաև ՀԱՊԿ–ի գլխավոր քարտուղար Յուրի Խաչատուրովին։ Դատարանը նրան ազատ է արձակել` հինգ միլիոն դրամ գրավի դիմաց։ Հայաստանի նոր իշխանությունները ակտիվորեն հետաքննում եմ 2008 թվականի մարտի 1–2 դեպքերը։ Անվանի պետական գործիչներին հարցաքննության են հրավիրում ու մեղադրանքներ են ներկայացնում։
