ԵՐԵՎԱՆ, 7 օգոստոսի — Sputnik. Բարերարների ֆինանսավորման շնորհիվ մոտ երկու տասնյակ հայ ուսանող հնարավորություն են ստացել շարունակելու ուսումն արտասահմանյան բուհերում։ Այս մասին այսօր լրագրողներին ասաց ՀՀ վարչապետի տիկին Աննա Հակոբյանը։
2018-2019 թվականներին սովորելու համար «Լույս» հիմնադրամ հայտ ներկայացրած 18 հայցորդներն արտասահմանում սովորելու համար միջոցներ կստանան։ Այդ նպատակով հայ բարերարները 517 հազար դոլար են նվիրաբերել։ Միջոցները ներկայացրել են «Վիտալի Գրիգորյանց» հիմնադրամը` 222 հազար դոլար, AGBU–ն` 200 հազար դոլար, կանադացի գործարար Վան Լապոյանի հիմնադրամը` 70 հազար դոլար ու ևս մեկ բարերար, ով չի ցանկացել հայտնել իր անունը։
Հիշեցնենք` «Լույս» հիմնադրամը հիմնադրվել է 2008 թվականի ապրիլին երրորդ նախագահ Սերժ Սարգսյանի հովանու ներքո. նա հիմնադրամի հոգաբարձուների խորհրդի նախագահն էր։ Այս տարիների ընթացքում հիմնադրամի միջոցներով աշխարհի տասը առաջատար բուհերում կրթություն են ստացել 570 հաշվառու։ «Թավշյա հեղափոխությունից» հետո «Լույս» հիմնադրամի կրթական ծրագրի հիմնադիր-գործադիր տնօրեն Ժաքլին Կարաասլանյանը հայտնել է հիմնադրամի գործունեության դադարի մասին։ ԶԼՄ–ներում տեղեկություն էր հայտնվել, որ հիմնադրամը զբաղվում էր փողերի լվացմամբ, սակայն այս տեղեկությունը դեռ չի հաստատվել։
«Իմ քայլը» հիմնադրամը քննարկումներ է սկսել Հայկական ընդհանուր բարեգործական միության (AGBU), նաև բազում այլ հետաքրքրված կողմերի հետ` հասկանալու` ինչպես է կարելի այս հարցը հիմնովին լուծել», – ընդգծեց Հակոբյանը։
Նրա համոզմամբ` «Լույս» հիմնադրամի գործունեությունն իսկապես կարևոր էր, եթե հաշվի չառնենք հիմնադրամի գործունեության թափանցիկության ու ուսանողների ընտրության օբյեկտիվության վերաբերյալ որոշ կասկածները։ Հակոբյանը հայտնել է, որ կուզեր հիմնադրամի ծրագրով կրթություն ստացած բոլոր ուսանողների մասնակցությամբ ֆորում անցկացնել։ Նա կարծում է, որ դա կօգներ նպաստել երկրում առկա բազում խնդիրների լուծմանը։
