ԵՐԵՎԱՆ, 6 օգոստոսի — Sputnik. Այսօր առավոտյան հայաստանցիները խանութներում տհաճ անակնկալի են բախվել։ Որոշ խանութներում շուրջ 10 դրամով թանկացել է 1 կգ–անոց հացը, շուրջ 20 դրամով` խմորեղենի տարբեր տեսակները։
Երևանի Ավան համայնքի խանութներից մեկի վաճառողուհին մեզ հետ զրույցում հայտնեց, որ հացի գինն իրենց մոտ չի փոխվել։ Բայց թանկացել են քաղցրավենիքի որոշ տեսակներ։
Ընդ որում` գործարանի ներկայացուցիչը, վաճառողուհու խոսքով, թանկացումը պատճառաբանել է ալյուրի գնի բարձրացմամբ։
Նույն պատճառաբանությամբ, Նոր Նորք համայնքի խանութներից մեկում թանկացել է այսօր առավոտյան ստացված գործարանային արտադրության հացի գինը։ Այս խանութում վաճառողուհին հայտնեց, որ թանկացել է միայն գործարանային հացի գինը։ «Հացի փռերը շարունակում են նույն գնով առաքել»,– ասաց նա։
ՀՀ տնտեսական մրցակցության պաշտպանության պետական հանձնաժողովում (ՏՄՊՊՀ) մեզ հայտնեցին, որ ալյուրի շուկայում թանկացում չի արձանագրվել։ Հանձնաժողովի մամուլի քարտուղար Գայանե Սահակյանը Sputnik Արմենիայի հետ զրույցում ասաց, որ հանձնաժողովը շուկայի վերջին դիտարկումն անցկացրել է այսօր։
«Դիտարկման ընթացքում ալյուրի շուկայում գնի փոփոխություն չի արձանագրվել։ Միջին որակի ալյուրի 1 կգ–ը Երևանյան վաճառակետերում վաճառվում է միջինը 202 դրամով»,– ասաց Գայանե Սահակյանը` հավելելով, որ ալյուրի այդ գինն անփոփոխ է մնացել առնվազն վերջին 1 ամսվա ընթացքում։
ՀՀ ազգային վիճակագրական ծառայության հրապարակած տվյալների համաձայն` 2018թ. հունվար-հունիս ամիսներին Հայաստանում արտադրվել է 67, 872.7 տոննա ալյուր, ինչը 2017 թ.-ի համեմատ 16.5%-ով քիչ է ։
