ԵՐԵՎԱՆ, 5 օգոստոսի –Sputnik. Լավ կլիներ, եթե Լատվիան ընդօրինակեր Հայաստանի փորձը, որտեղ նախկին նախագահին են ձերբակալել։ Baltcom ռադիոկայանի եթերում նման ցանկություն է հնչեցրել Սեյմի նախկին խոսնակ, Ստրադինի անվան համալսարանի պրոֆեսոր, քաղաքագետ Իլգա Կրեյտուսեն, հայտնում է Sputnik Լատվիան։
Նա խոստովանել է, որ երբեմն իր մոտ ցանկություն է առաջանում, որ Լատվիայում կրկնվի այն իրավիճակը, ինչ այս տարի տեղի ունեցավ Հայաստանում, երբ ձերբակալվեց նախկին նախագահ Ռոբերտ Քոչարյանը։
Սեյմի նախկին խոսնակը նաև ասել է, որ վատ չէր լինի, որ Լատվիայում ձերբակալեին այն նախարարներին, որոնք «վատ» օրենքներ են ընդունում։
«Երբեմն ուզում եմ, որ Լատվիան մեկ օրով Հայաստան դառնա, որտեղ ձերբակալել են նախկին նախագահին։ Որպեսզի մեզ մոտ ձերբակալեին այն նախարարներին, որոնք, օրինակ, էլեկտրաէներգիայի գնման պարտադիր բաղադրիչի մասին օրենք են ընդունել, որի պատճառով տուժում է Լատվիայի ժողովրդական տնտեսությունը», – ասել է Կրեյտուսեն։
Կրեյտուսեի կարծիքով` լատվիացի քաղաքական գործիչները սովորել են ոչ մի բանի համար պատասխան չտալ և իրենց բոլոր անհաջողությունները բարդել ժողովրդի վրա, ինչը հարց է ծնում`ինչի համար են այդ դեպքում ընդհանրապես պետք այդ քաղաքական գործիչները։
«Եթե ամեն ինչի համար պատասխան է տալիս միայն մարդը, ի՞նչի համար է մեզ անհրաժեշտ խորհրդարանը, կառավարությունը, քաղաքական գործիչները, որոնք կարգուկանոն են ստեղծում այս պետությունում։ Ընդհանրապես որևէ քաղաքական պատասխանատվություն գոյություն ունի՞։ Երբեմն ծիծաղելի է դառնում, երբ ասում են «մենք պահպանում ենք օրենքը»։ Դե, փոխեք այն։ Որպեսզի չպահպանեք այդ «վատ» օրենքը, չէ՞ որ իշխանություն եք։ Բայց, ոչ, այդ մասին որևէ մեկը չի խոսում», – պարզաբանել է իր դիրքորոշումը Կրեյտուսեն։
Խորհրդարանի նախկին խոսնակը նաև քննադատաբար է արձագանքել լատվիացիների կենսաթոշակների հետ առնչվող նոր օրենքի մասին։ Նա կոչ է արել քաղաքական գործիչներին մտածել այն օրենքների մասին, որոնք չեն օգնում երկրի բնակիչներին, այլ խոչընդոտներ են ստեղծում։
«Քաղաքական գործիչներ, ընդունեք էլի ձեր սխալները։ Խոստովանեք, որ սխալ հարկային քաղաքականություն էր կամ տնտեսական իրավիճակ։ Ինչպես կարող էր մի իրավիճակ ստեղծվեր, որ այսքան շատ աղքատ մարդ լիներ։ Բայց, չէ, մեղավորներ չկան», – նշել է Կրեյտուսեն։
Նրա խոսքով` քաղաքական գործիչները մշտապես խոսում են իրենց անմեղության մասին` բոլոր դժբախտությունների համար պատասխանատվությունը բարդելով հասարակ մարդկանց վրա։
