ԵՐԵՎԱՆ, 3 օգոստոսի — Sputnik. ՀՀ պաշտպանության նախարար Դավիթ Տոնոյանը չի բացառում, որ Հայաստանը կդիմի ռուսական կողմին` երրորդ ռազմական վարկը ստանալու հարցով։ Այս մասին այսօր նախարարը հայտնել է լրագրողների հետ զրույցում։
Միաժամանակ նա ասել է, որ վարկի շուրջ ռուսական կողմի հետ բանակցություններ առայժմ չեն վարվում, և չի ցանկացել նշել վարկի հնարավոր չափը։
«Կա համագործակցային և գործընկերային մթնոլորտ, որն արդեն տասնյակ տարիներ չի փոխվում»,– անդրադառնալով հայ-ռուսական ռազմական հարաբերություններին` ասել է Տոնոյանը` հավելելով, որ Հայաստանում գտնվող Ռուսաստանի պաշտպանության փոխնախարար Ֆոմինի հետ այսօր ևս ռազմական ու ռազմատեխնիկական հարցերով բանակցություններ են վարել։ Առանց փակագծերը բացելու, Տոնոյանը հայտնեց միայն, որ բանակցություններն անցել են չափազանց արդյունավետ` իր սպասածից ավելի։
Ինչ վերաբերում է այլ երկրների հետ ռազմական համագործակցությանը, Տոնոյանը նշել է, որ Հայաստանն այլ երկրներից ևս զենք ձեռք բերում է, բայց հրաժարվել է հայտնել այդ երկրների անունները։
