ԵՐԵՎԱՆ, 3 օգոստոսի — Sputnik. «Նուբարաշեն» քրեակատարողական հիմնարկի դատապարտյալները փորձել են բունտ անել՝ բռնություն կիրառելով ՔԿՀ-ի մասնագետների նկատմամբ:
Մամուլում տարածված այս տեղեկությունները «Նուբարաշեն» ՔԿՀ պետ, արդարադատության գնդապետ Էդուարդ Գրիգորյանը Sputnik Արմենիայի հետ զրույցում հերքեց։
«Շրջանառող լուրերն իրականությանը չեն համապատասխանում։ Հիմնարկում հանգիստ է»,– ասաց նա։
Իսկ հացադուլ հայտարարած դատապարտյալների մասին տեղեկությունները հիմնարկի ղեկավարը չի հերքում, բայց նշում է, որ նրանց բողոքն ու առաջ քաշած պահանջները վերաբերում են բացառապես իրենց քրեական գործերին։
Անդրադառնալով քրեակատարողական հիմնարկի գերբնակեցման խնդրին ու, մասնավորապես, մամուլում պարբերաբար հայտնվող հաղորդումներին, թե այստեղ տեղերի սահմանափակ լինելու պատճառով դատապարտյալները ստիպված են լինում հերթով քնել, Էդուարդ Գրիգորյանն ասաց. «Բոլորը քնելատեղերով ապահովված են։ Շենքը 20 տարվա շենք է, պարբերաբար վերանորոգվում է։ Այս պահին նման խնդիրներ չունենք»։
Նշենք, որ Արդարադատության նախարարության քրեակատարողական վարչությունից Sputnik Արմենիային տրամադրած տեղեկությունների համաձայն, 2018թ–ի հունվարի 1-ի դրությամբ 780 դատապարտյալի համար նախատեսված ՔԿՀ–ի տարածքում 792 կալանավոր է պահվում։
Արդարադատության գնդապետ Էդուարդ Գրիգորյանը «Նուբարաշեն» ՔԿՀ պետի պաշտոնը զբաղեցնում է ս.թ. հուլիսի 26-ից։
