ԵՐԵՎԱՆ, 2 օգոստոսի – Sputnik. Ռուս սահմանապահները լավ են պահպանում հայ–թուրքական սահմանը։ Այս մասին Sputnik Արմենիայի հետ զրույցում ասաց Արարատի մարզպետ, «Քաղաքացիական պայմանագիր» կուսակցության անդամ Գագիկ Սարգսյանը։
Դրանից ժամեր առաջ Հայաստանում Ռուսաստանի ԱԴԾ սահմանապահ վարչության աշխատակիցները ձերբակալել էին Թուրքիայի քաղաքացու, որն իր մոտ հայտնաբերված հեռախոսում ունեցել էր հայ–թուրքական սահմանի ինժեներական կառույցների տեսագրություն ու լուսանկարներ։
Մարզպետի խոսքով` սահմանամերձ գյուղերում գյուղացիները հանգիստ գյուղատնտեսությամբ են զբաղվում, այդ թվում` «ցանկապատից այն կողմ»։ Նրանք այնտեղ մշակվող դաշտեր ունեն։ Սահմանապահները չեն խոչընդոտում, թույլտվությունները ԱԱԾ–ն է տալիս։
«Սահմանապահների աշխատանքից ոչ մի դժգոհություն չկա։ Դեպքեր են եղել, երբ մարդիկ վիճել են համայնքապետների հետ, որոնք թույլտվությունները չեն ստորագրել», – ասաց Սարգսյանը` նշելով, որ անձամբ կապ է պահում սահմանապահների հետ։
Այս մասին վկայում է այն փաստը, որ օգոստոսի 2–ին Սարգսյանը հարգանքի տուրք է մատուցել խորհրդային սահմանապահ Ալեքսանդր Կորյակովի հիշատակին, որն ուղիղ 70 տարի առաջ կանխել է թուրք դիվերսանտների մուտքը Հայաստան։
«Ես այստեղ եմ, որ հարգանքի տուրք մատուցեմ սահմանապահի հիշատակին ու այսպիսով վերջ տամ տրամադրություններին, որոնք վնասում են հայ–ռուսական դարավոր բարեկամությանը։ Մենք կապված ենք ինչպես մշակութային, այնպես էլ՝ տնտեսական կապերով։ Նրանք մեր ռազմավարական, ռազմական դաշնակիցներն ու մեր ընկերներն են», – ասաց Սարգսյանը։
Նա կարծում է, որ ոչ ոք չպետք է հակառուսական տրամադրություններ ստեղծի։ Իսկ այն մարդիկ, որ դրանով զբաղվում են, «ինչ–որ տարրեն են, որոնք ուզում են որոշակի նպատակների հասնել»։
Սարգսյանը նշեց, որ իրենք զգոն են ու շարունակում են բարեկամական հարաբերություններ պահպանել ռուս գործընկերների հետ լինի դա Արարատի, Շիրակի, թե այլ մարզերում։
Հայաստանում Ռուսաստանի ԱԴԾ սահմանապահ վարչության մեջ մտնում են չորս սահմանապահ ջոկատներ, որոնք տեղակայված են Գյումրիում, Արմավիրում, Արտաշատում և Մեղրիում, ինչպես նաև առանձին հսկիչ անցակետ Երևանի «Զվարթնոց» միջազգային օդանավակայանում։ Հայաստանում ռուս սահմանապահների (մոտ 4.5 հազար մարդ) ապրուստը հոգում են երկու երկրների կառավարությունները։
