ԵՐԵՎԱՆ, 2 օգոստոսի — Sputnik. ՀՀ վարչապետը որոշել է ամփոփել պաշտոնը ստանձնելու 100-օրյա աշխատանքի արդյունքները հանրահավաքի տեսքով այն պարզ պատճառով, որ անհարմար հարցեր քաղաքացիների կողմից այստեղ չեն հնչի։
Հինգշաբթի հրավիրված մամուլի ասուլիսի ժամանակ նման կարծիք է հայտնել քաղտեխնոլոգ Արմեն Բադալյանը։
Ավելի վաղ կառավարության ղեկավար Նիկոլ Փաշինյանը հայտնել էր օգոստոսի 17-ին Երևանի Հանրապետության հրապարակում հանրահավաք հրավիրելու մտադրության մասին։ Նրա խոսքով` հանրահավաքը հիանալի հնարավորություն է «քաղաքացիների հետ շփվելու», խոսելու այս 100 օրվա ընթացքում կառավարության կատարած աշխատանքի մասին։
Քաղտեխնոլոգի կարծիքով` հանրահավաքի ընտրությունը, որպես շփման ձևաչափ, պատահական չէ։ Հանրահավաքը` իռացիոնալ, էմոցիոնալ հարթակ է, այստեղ բանավեճեր և հարցի բուն էության վերաբերյալ քննարկումներ չեն անցկացվում։ Ինչն էլ անհրաժեշտ է Փաշինյանին։
«Բանն այն է, որ վարչապետի պաշտոնում 100 օր աշխատելու ընթացքում, Փաշինյանն ու իր թիմը այդպես էլ չկարողացան Հայաստանի քաղաքական և սոցիալ–տնտեսական զարգացման հասկանալի հայեցակարգ ներկայացնել։ Եվ Փաշինյանին ուղղված արդեն այսօր են անհարմար հարցեր առաջանում։ Սակայն հանրահավաքի մասնակիցներն, անկասկած, չեն կարողանա դրանք հնչեցնել, այդ պատճառով էլ ընտրվել է նրանց հետ շփվելու նման անվտանգ տարբերակը», – կարծում է Բադալյանը։
Երբ իշխանությունը նման անորոշության և զարգացման հեռանկարների հասկանալի տեսլականի բացակայության ռացիոնալ բացատրություն չունի, և նա զբաղված է միայն այժմեական, տակտիկական խնդիրները լուծելով, «էմոցիայի» խաղաքարն է խաղարկվում։
Հանրահավաքի օգնությամբ վարչապետը նաև հասարակությանը հասցնում է այն ուղերձը, որ հեղափոխությունը դեռ շարունակվում է։ Մինչդեռ այն, փորձագետի կարծիքով, վաղուց պետք է ավարտված լիներ։
