ԵՐԵՎԱՆ, 2 օգոստոսի — Sputnik. ՀՀ պաշտպանության նախարարությունը հայտնում է, որ բանակում հայտնաբերել են վարտիքներ, որոնք ժամանակին ցածր որակի պատճառով մերժվել են և վերադարձվել մատակարար ընկերությանը։
«Նախնական ուսումնասիրությունների արդյունքում պարզվել է, որ նմանատիպ վարտիքների խմբաքանակ դեռևս 2017 թվականին փորձ է արվել մատակարարել պաշտպանության նախարարություն, սակայն ակնհայտ ցածրորակության պատճառով այն չի ընդունվել և վերադարձվել է մատակարար ընկերությանը»,– հայտնում է ՊՆ–ն:
Բայց անորակ վարտիքներն, այնուամենայնիվ, հայտնվել են բանակում։ Այս պահին ՊՆ–ն արդեն հայտնաբերել է դրանցից 10 000 հատ։
ՀՀ պաշտպանության նախարարի խիստ հանձնարարականով զորամասերում այժմ ակտիվ ուսումնասիրություններ են ընթանում անորակ վարտիքներ հայտնաբերելու, մեղավորներին բացահայտելու և պատասխանատվության ենթարկելու համար:
Նախապատրաստվում են նյութեր քրեական գործ հարուցելու համար։
