ԵՐԵՎԱՆ, 2 օգոստոսի — Sputnik. ՀԱՊԿ գլխավոր քարտուղար Յուրի Խաչատուրովին թույլատրվել է մեկնել Մոսկվա։ Այս մասին այսօր Sputnik Արմենիային հայտնեց վերջինիս փաստաբան Միհրան Պողոսյանը։
«Մեզ համար կարևոր էր, որ գրավոր համաձայնությունը լինի վայրույթ իրականացնող մարմնից, ինչը քիչ առաջ ստացված գրությամբ, փաստորեն տրվեց»,– ասաց փաստաբանը` հավելելով, որ Հայաստանից մեկնելու իրավունք Յուրի Խաչատուրովն ուներ խափանման միջոց գրավի կիրառման առաջին իսկ վայրկյանից։
Նա նաև նշեց, որ Խաչատուրովի մեկնելը որևէ կապ չունի քրեական գործի հետ և պայմանավորված է ՀԱՊԿ–ում նրա մշտական աշխատանքով։
«Իմ պաշտպանյալը պարտավորվել է վարույթն իրականացնող մարմնի առաջին իսկ կանչի դեպքում ներկայանալ»,– ասաց Պողոսյանը։
Թե երբ կմեկնի Խաչատուրովը, փաստաբանը տեղյակ չէ, բայց նշեց, որ իր տեղեկություններով հուլիսի 31-ից սկսած լայնածավալ աշխատանքներ ունի աշխատավայրում։
Այս տեղեկությունները Sputnik Արմենիայի հետ զրույցում հաստատեց նաև ՀՔԾ մամուլի քարտուղար Մարինա Օհանջանյանը։
«Նրա նկատմամբ ընտրված խափանման միջոցը` գրավը, արգելք չէ, որ նա որոշակի ժամանակահատվածով լքի ՀՀ տարածքը և այդ մասին տեղեկացվել է նաև իրեն»,– մեր հարցին ի պատասխան ասաց նա։
Հիշեցնենք` Յուրի Խաչատուրովին մեղադրանք է առաջադրվել Մարտի 1-ի գործով` Սահմանադրական կարգը տապալելու համար՝ ՀՀ Քրեական օրենսգրքի 300.1 հոդվածի հատկանիշներով։ ՀՔԾ-ն միջնորդություն էր ներկայացրել Երևանի ընդհանուր իրավասության դատարան՝ նրան կալանավորելու մասին։ Սակայն դատարանը, հաշվի առնելով ի պաշտոնե նրա համար սահմանված անձեռնմխելիության իրավունքը, որոշեց խափանման միջոց կիրառել 5 մլն դրամ գրավը։
ՀՀ ԱԳՆ խոսնակ Տիգրան Բալայանը նախօրեին լրագրողների հետ հանդիպմանն ասել էր, որ հայկական կողմն առաջարկել է ՀԱՊԿ գործընկերներին սկսել գլխավոր քարտուղարի փոխարինման գործընթացը։ Իսկ քանի դեռ ՀԱՊԿ–ը որոշում չի ընդունել Խաչատուրովին փոխարինելու վերաբերյալ, նա շարունակում է մնալ այդ կառույցի գլխավոր քարտուղարը։
