ԵՐԵՎԱՆ, 2 օգոստոսի — Sputnik. Մինչ վարչապետի պաշտոնը ստանձնելը Նիկոլ Փաշինյանը տեղյակ էր, որ Հայաստանում կա զուգահեռ իրականություն. կա Սահմանադրություն և կա դրան հակառակ իրականություն: Այս մասին այսօր Նիկոլ Փաշինյանը հայտարարեց կառավարության նիստում` հավելելով, որ պաշտոնը ստանձնելուց հետո հասկացել է, որ զուգահեռ իրականություններ կան նաև կրթական ոլորտում:
«Դպրոցն ավարտելիս տալիս են գերազանց գնահատականներով ատեստատ, բայց բուհ ընդունվելու համար պետք է գնալ լրացուցիչ պարապել, որովհետև Սահմանադրության նման այն, ինչ գրված է դեռ իրականությունը չի արտացոլում»,- ասաց Փաշինյանը:
Վարչապետը նշեց նաև, որ այսօր Հայաստանում գրեթե բոլոր գերատեսչություններն ունեն կից կրթական հաստատություններ` ԱԻՆ ակադեմիա, Արդարադատության ակադեմիա, Ռազմական ակադեմիա և այլն: Ընդ որում, Փաշինյանի դիտարկմամբ, այդ ակադեմիաները շատ հաճախ ավելի որակյալ կադրեր ու գիտելիքներ են ապահովում, քան նույն մասնագիտությամբ բուհական կրթությունը:
«Եթե մենք համոզված ենք, որ մեր դիվանագիտական ակադեմիան ավելի որակյալ կրթություն է տալիս, օրինակ` մագիստրատուրայի մակարդակով, ինչո՞ւ մենք չենք նույնականացնում այն արտաքին հարաբերությունների ֆակուլտետի մագիստրատուրայի հետ և այդ ծառայությունը պատվիրում ավելի բարձր կրթական որակ ապահովող օղակին»,- ասաց Փաշինյանը` հավելելով, որ դա կհանգեցնի ոչ միայն կադրերի պատրաստման ավելի արդյունավետ համակարգ ունենալուն, այլև պետական հսկայական միջոցների խնայողությանը: «Մենք նույն նպատակի համար, փաստորեն, երկու անգամ տարբեր տեղերում ծախսում ենք պետական միջոցներ:
ԿԳ նախարար Արայիկ Հարությունյանն, արձագանքելով վարչապետի առաջարկին, նշեց, որ այդ ոլորտում կտրուկ քայլեր ձեռնարկել չի կարելի, քանի որ դա երկարատև գնահատման գործընթաց է ենթադրում: Փոխարենը նախարարը նշեց, որ մասնավոր բուհերի պարագայում կտրուկ քայլեր արվելու են և այդ բուհերի ղեկավարներն արդեն իսկ տեղեկացված են հնարավոր փակման մասին:
