ԵՐԵՎԱՆ, 1 օգոստոսի — Sputnik. Իրենց հորը` Միխայիլին սպանած քույրերին թույլ չեն տալիս հանդիպել իրենց փաստաբան՝ Ալեքսեյ Պարշինի հետ։ Այս մասին այսօր Facebook–ի իր էջում գրել է «Մոսկվայի իրավաբանական կենտրոնի» փաստաբանների կոլեգիայի ներկայացուցիչ Մարի Դավթյանը։
Նա նշել է, որ Խաչատուրյան քույրերի գործը Կանանց ոչ պետական միավորումների կոնսորցիումի վերահսկողության ներքո է։
«Գործին են միացել Ալեքսեյ Պարշինն ու նրա թիմը։ Այժմ Ալեքսեյ Պարշինին թույլ չեն տալիս ներս անցնել և հանդիպել Անգելինա Խաչատուրյանի հետ, անկախ նրանից, որ աղջիկն արդեն իր համաձայնությունը տվել է որպես իր պաշտպան նրա մասնակցության համար», – գրել է Դավթյանը։
Նրա խոսքով` մեկուսարանում պնդում են, որ քննիչը կարգադրել է որևէ փաստաբանի ներս չթողնել, բացառությամբ նրան, ում արդեն իսկ նշանակել են աղջիկների շահերը պաշտպանելու համար։
Հիշեցնենք, որ Միխայիլ Խաչատուրյանի մարմինը 40 կտրած–ծակած վնասվածքներով հայտնաբերել էին հունիսի 29-ին մոսկովյան բնակելի տներից մեկի աստիճանների մոտ։ Հաջորդ օրը սպանության մեղադրանքով ձերբակալվել էին սպանվածի երեք դուստրերը` 17, 18 ու 19 տարեկան։ Հարցաքննության ժամանակ աղջիկները խոստովանել էին մեղքն ու ասել, որ հայրը երկար ժամանակ իրենց «հոգեբանորեն նվաստացրել» է։ Աղջիկներից մեկը հարցաքննության ժամանակ հայտնել էր, որ հայրն առաջինն է հարձակվել` նրան դանակով վնասվածք հասցնելով ազդրի շրջանում։
Մահացածի որդին չի հավատում, որ դեպքերն այդպես են զարգացել։ Նրա վարկածի համաձայն` հանցագործությունը մանրակրկիտ ծրագրած է եղել, իսկ ողբերգությունից մի քանի ժամ առաջ աղջիկներն անձնական նամակում միմյանց հետ զրուցելիս գրել էին, որ «պատրաստ են նրան սպանել»։
