ԵՐԵՎԱՆ, 1 օգոստոսի — Sputnik. Զբաղեցրած պաշտոնից ազատվելու դիմում է ներկայացրել «Տոբոլի» գլխավոր մարզիչը:
Այս մասին տեղեկացնում է ֆուտբոլային ակումբի լրատվական ծառայությունը:
Վլադիմիր Նիկիտենկոն աշխատանքից ազատվելու դիմումը ներկայացրել է «Փյունիկ»-«Տոբոլ» խաղից հետո, երբ իր սաները պարտվեցին հայկական ակումբին:
Հիշեցնենք, որ հուլիսի 31-ին Ֆուտբոլի Եվրոպայի լիգայի որակավորման երկրորդ փուլի խաղերում Երևանի «Փյունիկ»-ը Հանրապետական մարզադաշտում հյուրընկալել էր ղազախական «Տոբոլ»-ին:
Խաղի սկզբում պայքարը հավասար էր ընթանում, սակայն «Տոբոլ»-ի գրոհներ կամաց-կամաց սկսել էին վտանգավոր դառնալ:
Սակայն երկրորդ խաղակեսում անհաջողությունները դարձան «Տոբոլ»-ի ուղեկիցը, իսկ 83-րդ րոպեին հյուրերի դարպասը գրավեց Մուհամեդ Կոնատեն: «Փյունիկ»-ը հաղթեց նվազագույն հաշվով և դուրս եկավ Եվրոպայի լիգայի որակավորման երրորդ փուլ:
Այս փուլում «Փյունիկը» կխաղա «Մաքաբի» (Թել Ավիվ)-«Ռադնիչկի» (Նիշ) թիմերից հաղթողի հետ։ Նրանց առաջին հանդիպմանը հաղթել էր «Մաքաբին» 2:0 հաշվով, իսկ պատասխան հանդիպումը կկայանա օգոստոսի 2-ին:
