ԵՐԵՎԱՆ, 31 հուլիսի — Sputnik. ՀԱՊԿ ղեկավարությունը տվյալներ չունի այն մասին, թե արդյոք Հայաստանը պաշտոնական հարցում ուղարկե՞լ է Յուրի Խաչատուրովին գլխավոր քարտուղարի պաշտոնից հետ կանչելու մասին։ Այս մասին ՌԻԱ Նովոստիին է հայտնել ՀԱՊԿ գլխավոր քարտուղարի տեղակալ Վալերի Սեմերիկովը։
Հայաստանի հատուկ քննչական ծառայությունն ավելի վաղ մեղադրանք էր առաջադրել ՀԱՊԿ գլխավոր քարտուղար Յուրի Խաչատուրովին` 2008 թվականի մարտի 1-ի բողոքի ակցիաները ցրելու քրեական գործի շրջանակներում սահմանադրական կարգը տապալելու համար։ Դատարանը փոխել է նրա խափանման միջոցը` 5 մլն դրամ (ավելի քան 10 հազար դոլար) գրավի դիմաց. գումարն արդեն մուծված է, գլխավոր քարտուղարն ազատության մեջ է։
Պատասխանելով այն հարցին, թե արդյոք հայկական կողմն արդեն դիմել է ՀԱՊԿ գլխավոր քարտուղարի պաշտոնից Խաչատուրովին հետ կանչելու պաշտոնական հարցումով` Սեմերիկովն ասել է. «Տեղեկություն չունեմ, թե հայկական կողմը գործող գլխավոր քարտուղարի վերաբերյալ դիմել է որևէ պաշտոնական փաստաթղթով»։
Ավելի վաղ ՌԴ ԱԳՆ–ն հայտնել էր, որ Երևանը պետք է անձամբ նախաձեռնի իր քաղաքացու հետ կանչը ՀԱՊԿ գլխավոր քարտուղարի պաշտոնից։
ՀԱՊԿ–ի անդամ է 6 պետություն` Հայաստանը, Բելառուսը, Ղազախստանը, Ղրղըզստանը, ՌԴ–ն և Տաջիկստանը։
