ԵՐԵՎԱՆ, 27 հուլիսի — Sputnik. Ռոբերտ Քոչարյանին կալանավորելու հարցով նախաքննական մարմնի միջնորդության վերաբերյալ դատարանը հրապարակեց վճիռը:
Ռոբերտ Քոչարյանի փաստաբան Արամ Օրբելյանը տեղեկացրեց, որ Դատարանը կայացրել է կալանավորման որոշում: Այս պահի դրությամբ, ըստ կարգի, Ռոբերտ Քոչարյանը երկու ամիս կլինի մեկուսարանում: ՀՀ երկրորդ նախագահը, դատարանի վճիռը լսելուց հետո, ոչ մի հայտարարություն չի արել:
Փաստաբանը տեղեկացրեց նաև, որ վաղը ժամը 12:00-ին հրավիրված ասուլիսում իր գործընկերների հետ ավելի շատ մանրամասներ կներկայացնի:
Հիշեցնենք, որ հուլիսի 26–ին ՀՀ 2–րդ նախագահ Ռոբերտ Քոչարյանը կանչվել էր հարցաքննության Մարտի 1–ի գործով որպես վկա։
Հարցաքննությունից հետո Հատուկ քննչական ծառայությունը հայտարարություն տարածեց այն մասին, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
Միջնորդություն էր ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:
