ԵՐԵՎԱՆ, 27 հուլիսի — Sputnik. Մեր ուշադրության կենտրոնում են ոչ միայն բարձր տեխնոլոգիաների ոլորտում համագործակցության հարցերը, այլև փոխգործակցության ավանդական ուղղությունները,-հայտարարել է վարչապետ Փաշինյանը՝ Եվրասիական միջկառավարական խորհրդի հերթական նիստի իր ելույթում:
Նա շեշտել է, որ առաջին հերթին դրանք այն ուղղություններն են, որոնցով պետք է դուրս գալ միասնական շուկաներ:
«Կարծում ենք, որ գազի ընդհանուր շուկան նոր լիցք կհաղորդի երկրների միջև տնտեսական համագործակցությանը, կբարձրացնի անդամ երկրների ինտեգրման մակարդակն ու մրցունակությունը, սպառողների գազամատակարարման հուսալիության, հասանելիության ու որակի մակարդակը, կնպաստի Միությունում բարեխիղճ մրցակցության զարգացմանը, դրական ազդեցություն կունենա գնագոյացման համար»,-մանրամասնել է ՀՀ վարչապետը:
Նիկոլ Փաշինյանն անդրադարձել է նաև Ավիացիոն պատահարների հետաքննության մարմնի ստեղծման հարցին: Ըստ Փաշինյանի՝ պետք է ուշադիր լինել, որ այդ նոր ձևավորվող մարմինն իր գործառույթներով չկրկնօրինակի Միջազգային ավիացիոն կոմիտեի գործառույթները:
Ելույթի ավարտին վարչապետը հույս է հայտնել, որ ձեռք բերված պայմանավորվածությունները կնպաստեն ԵԱՏՄ արդյունավետության բարձրացմանն ու երկրների հետևողական զարգացմանը:
