ԵՐԵՎԱՆ, 27 հուլիսի — Sputnik. ՀԱՊԿ գլխավոր քարտուղար Յուրի Խաչատուրովը չի հասկանում, թե իր նկատմամբ ինչու են մեղադրանք առաջադրել։ Այս մասին լրագրողների հետ զրույցում ասաց նրա փաստաբան Միհրան Պողոսյանը։
«Դատական նիստն ընդհատված է։ Մեզ մոտ ընդմիջում է` պաշտպանության համար բավարար տվյալներ հավաքելու և առաջադրված մեղադրանքին ծանոթանալու համար։ Իմ պաշտպանյալին մինչև հիմա չեն բացատրել մեղադրանքի էությունը», — ասաց փաստաբանը։
Դատական նիստը կվերսկսվի ժամը 18։00-ից հետո։
Ավելի վաղ Խաչատուրովն ասել էր լրագրողներին, որ չի ընդունում Հայաստանի սահմանադրական կարգը տապալելու մեղադրանքները։
Նշենք, որ ՀՔԾ-ն այսօր հայտարարություն էր տարածել` նշելով, որ հուլիսի 26-ին ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
Հատուկ քննչական ծառայությունը հայտնում է, որ քննիչը միջնորդություն է ներկայացրել Երևան քաղաքի ընդհանուր իրավասության առաջին ատյանի դատարան` Յուրի Խաչատուրովի նկատմամբ կալանավորումը որպես խափանման միջոց ընտրելու համար:
