ՍԱՆՏԿ ՊԵՏԵՐԲՈՒՐԳ, 27 հուլիսի — Sputnik. ՀՀ վարչապետ Նիկոլ Փաշինյանը հույս ունի, որ հայ-ռուսական հարաբերությունները կշարունակեն զարգանալ ու նոր մակարդակի կհանվեն։ Այս մասին նա ասել է ՌԴ վարչապետ Դմիտրի Մեդվեդևի հետ հանդիպման ժամանակ, Եվրասիական միջկառավարական խորհրդի հերթական նիստից հետո:
Մեդվեդևը ողջունել է Փաշինյանին` նշելով, որ ուրախ է նրա հետ շփումը շարունակելու ու երկկողմանի օրակարգի վերաբերյալ մտքեր փոխանակելու հնարավորության համար։
Փաշինյանն իր հերթին ասել է, որ այս համատեքստում հանդիպումները խիստ օգտակար են, քանի որ հնավորություն են տալիս քննարկել երկկողմ հարաբերությունների բոլոր նրբությունները։
«Կարծում եմ` մեր հարաբերությունների համար, ինչպես ԵԱՏՄ–ի շրջանակում, այնպես էլ երկկողմ, այսպիսի հանդիպումներն օգտակար են։ Դրանք մեր հարաբերությունները նոր մակարդակի են հանում։ Կարծում եմ, որ և՛ Մոսկվան, և՛ Երևանը շահագրգռված են դրանում. ուրախ եմ, որ վերջին երկուսուկես ամսվա ընթացքում բազմիցս հնարավորություն եմ ունեցել քննարկելու դա», – ընդգծել է ՀՀ գործադիրի ղեկավարը։
Նա նկատում է, որ երկու երկրների հարաբերությունները շատ արդյունավետ են զարգանում։
«Ես գրեթե չեմ կասկածում, որ այս տեմպը ոչ միայն կշարունակվի, այլև ավելի արդյունավետ կդառնա», – ամփոփել է Փաշինյանը։
