ԵՐԵՎԱՆ, 24 հուլիսի — Sputnik. Հայաստանի բնակչության առողջության պահպանման մասին օրինագծերի նոր փաթեթը նախատեսում է ծխախոտի վաճառքի և գովազդի կանոնների զգալի խստացում։ Այդ մասին երեքշաբթի լրագրողներին ասաց Առողջապահության ազգային ինստիտուտի տնօրեն, ազգային հակածխախոտային ծրագրի ղեկավար Ալեքսանդր Բազարչյանը։
Նա նշել է, որ գովազդի և վաճառքի սահմանափակումները կտարածվեն ոչ միայն ծխախոտային արտադրանքի, այլ նաև էլեկտրոնային սիգարետի, էլեկտրոնային գաջեթների և նարգիլեի վրա:
Փորձագետը հավելեց, որ առաջարկներ են մտցվել վաճառակետերում ծխախոտի գովազդն ու արտադրանքն առաջ մղելու միջոցներն արգելելու մասին։
Բացի այդ, նախատեսված են անչափահասներին ծխախոտային արտադրանք վաճառելու դեմ պայքարի կոշտ մեխանիզմներ։
«Օրինագծերից մեկում ընկած է առողջության ցուցանիշների պահպանման և բարելավման սկզբունքը։ Մենք չենք ցանկանում վնաս հասցնել ծխախոտի արտադրությանը, բայց պետք է հարգել չծխողների իրավունքները», – ասաց Բազարչյանը։
Իր հերթին Հիվանդությունների վերահսկողության և կանխարգելման կենտրոնի փոխտնօրեն Դավիթ Պետրոսյանը կարծում է, որ ծխախոտային մագնատների թիրախ են դառնում, առաջին հերթին, դեռահասները, ուստի պետք է դեռահասների շարքում սիգարետային արտադրանքի և գովազդի դեմ պայքարի կոշտ մեխանիզմներ մշակել։
Պետրոսյանը համոզված է, որ անհրաժեշտ է մշակել ռազմավարություն և հատուկ հակածխախոտային ծրագիր, որը կհետաքրքրի հենց անչափահասներին։
«Պետք է պատմել չծխող դեռահասների հաջողության պատմություններ` կոտրելու համար այն կարծրատիպը, որ ծխելը հարգի է», – կարծում է նա։
Փորձագետը համարում է, որ պասիվ ծխելը բացառելու լավագույն մեխանիզմը փակ հասարակական վայրերում ծխելն արգելելն է և մեծ տուգանքները, որոնք կստիպեն ծխողներին մտածել հրաժարվելու մասին։
Ավելի վաղ առողջապահության նախարար Արսեն Թորոսյանը հայտարարել էր, որ անձամբ շահագրգռված է իրավական ակտեր ընդունելու մեջ, որոնք կարգելեն ծխելը հասարակական վայրերում։
Նա նաև կոչ էր արել փորձագիտական խմբին ավարտել «Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագծի մշակումը, որը խոշոր տուգանքներ է նախատեսում հասարակական վայրերում ծխելու համար։ Օրինագիծը մեծ իրարանցում և բուռն քննարկումներ է առաջացրել հասարակությունում։
