ԵՐԵՎԱՆ, 21 հուլիսի — Sputnik. Ոչ մի դեպք չի կարող խաթարել հայ —ռուսական հարաբերությունները, նույնիսկ Փանիկի միջադեպը, այսօր` հուլիսի 21-ին ասաց 102-րդ ռազմակայանի հրամանատար գնդապետ Վլադիմիր Ելկանովը Գյումրում տեղակայված 102-րդ ռազմակայանի տարածքում անցկացված կլոր սեղան-քննարկման ժամանակ։
«Պաշտոնատար անձինք տեղյակ են եղել, որ Փանիկում միջոցառում է անցկացվելու»,- նշեց նա։
Քննարկման ժամանակ ներկայացվեց ռազմակայանի տեղակայման ամբողջ պատմությունը և այն տարածքը, որի հսկողությունն իրականացվում է ռազմակայանի միջոցով։
Ռուս գնդապետն ափսոսանքն է հայտնել Փանիկում տեղի ունեցած միջադեպի կապակցությամբ
Ելկանովը նաև նշեց, որ ռազմակայանի գործունեության տարիների ընթացքում սերտ համագործակցություն է եղել Հայաստանի հետ։
Նա ևս մեկ անգամ շեշտեց, որ կրակոցներն ուսումնական են եղել։
Քննարկման ժամանակ հայ-ռուսական հարաբերությունների մասին խոսեցին նաև տարբեր ՀԿ-ների ներկայացուցիչներ` կարևորելով Հայաստանի և Ռուսաստանի համագործակցությունը։
Փանիկում տեղի ունեցածը սադրանք է. Փաշինյան
Նշենք, որ «Հայ-ռուսական հարաբերությունները» թեմայով կլոր սեղան-քննարկումն անցկացվեց Հումանիտար զարգացման հասարակական կազմակերպության նախաձեռնությամբ և Հայաստանում Ռուսաստանի գիտության և մշակույթի կենտրոնի աջակցությամբ։
Հիշեցնենք, որ հուլիսի 17-ի առավոտյան Գյումրիում տեղակայված 102-րդ ռազմակայանի զինծառայողները զորավարժություն էին անցկացրել Արթիկի տարածաշրջանի Փանիկ գյուղի վարչական տարածքում։ Զորավարժություններն ուղեկցվել էին կրակոցներով: Այս մասին Sputnik Արմենիային տեղեկացրել էր Փանիկ համայնքի ղեկավար Վարդան Մակեյանը՝ նշելով, որ երեխաները վախեցել են:
«Գյուղի տարածքը ռազմաբազայի զորավարժությունների անցկացման համար երբևէ չի ծառայել, և ռազմաբազայի ղեկավարությունից այս մասին պաշտոնական գրություն չենք ստացել»,- նշել էր համայնքի ղեկավարը` ասելով, որ ինքն անմիջապես այդ մասին տեղեկացրել է Շիրակի մարզային ոստիկանությանն ու Ազգային անվտանգության ծառայությանը:
Ուժային կառույցների աշխատակիցները մեկնել էին գյուղի տարածք` իրավիճակին ծանոթանալու:
