ԵՐԵՎԱՆ, 20 հուլիսի — Sputnik. Հանրապետության նախագահ Արմեն Սարգսյանն այսօր այցելել է մեծանուն նկարիչ Մինաս Ավետիսյանի տուն՝ շնորհավորել նրա այրուն, զավակներին ու թոռներին՝ մեծ նկարչի ծննդյան 90-ամյակի առթիվ:
Նախագահը դիտել է Մինասի վաղ շրջանի մի քանի գործեր, զրուցել ընտանիքի անդամների հետ, լսել նրանց պատմությունները Մինասի մասին:
Այնուհետեւ նախագահ Սարգսյանն այցելել է նկարչի արվեստանոց, որտեղ այսօր ստեղծագործում է նրա որդին՝ նկարիչ Նարեկ Ավետիսյանը:
Արմեն Սարգսյանը դիտել է նրա կտավները, զրուցել հայ ժամանակակից արվեստի զարգացման միտումների մասին:
![Армен Саркисян посетил мастерскую Минаса Аветисяна Армен Саркисян посетил мастерскую Минаса Аветисяна - Sputnik Արմենիա](https://cdn.am.sputniknews.ru/img/1336/92/13369209_0:0:1500:997_600x0_80_0_0_8f3e1c4b7d2631b796a9fbad95b6d5a0.jpg)
Մինաս Ավետիսյան 20-րդ դարի երկրորդ կեսի հայ կերպարվեստի ամենակարկառուն ներկայացուցիչներից մեկն է: Ծնվել էը 1928 թ.-ի հուլիսի 20-ին Ջաջուռում (Շիրակի մարզ)։ Համեմատաբար ուշ է սկսել զբաղվել գեղանկարչությամբ։ Պատանի հասակում տարված է եղել Մարտիրոս Սարյանի արվեստով։ Մինասի գեղարվեստական և էսթետական զարգացման գործում մեծ ազդեցություն են ունեցել Հայկական մանրանկարչությունը և իտալական վերածննդի նկարչությունը։
![Армен Саркисян посетил мастерскую Минаса Аветисяна Армен Саркисян посетил мастерскую Минаса Аветисяна - Sputnik Արմենիա](https://cdn.am.sputniknews.ru/img/1336/90/13369062_0:0:1500:1100_600x0_80_0_0_24c2db538f77ad68176f82468da1347c.jpg)
Նա ստեղծել է հայկական գյուղաշխարհն արտացոլող կոմպոզիցիաներ, բնանկարներ, ինչպես նաև դիմանկարներ, նատյուրմորտներ, որմնանկարներ։
Մինասի հասուն ստեղծագործական կյանքը տևել է 15 տարի՝ 1960–1975 թթ, որի ընթացքում նկարիչը ստեղծել է մոտ հինգ հարյուր մեծ ու փոքր կտավ, մոտավորապես նույնքան գծանկար, քսան մեծածավալ որմնանկար, մեկ տասնյակից ավելի բալետային ու թատերական ձևավորումներ։
1975 փետրվարի 16-ին Մինասը Երևանում ենթարկվում է ավտովթարի։ Վախճանվում է մեկ շաբաթ անց՝ փետրվարի 24-ին։