ԵՐԵՎԱՆ, 20 հուլիսի — Sputnik. ՀՀ վարչապետը բացառում է ԼՂ կարգավորման այնպիսի լուծումը, որն ընդունելի չի լինի հայկական երկու պետությունների ժողովրդի համար։ Այս մասին Նիկոլ Փաշինյանն այսօր հայտարարեց լրագրողների հետ հանդիպմանը` պատասխանելով բանակցային գործընթացում փոխզիջումային տարբերակի մասին հարցին։
«Մենք մեթոդական սխալ ենք թույլ տալիս, երբ Հայաստանի կառավարության որևէ ներկայացուցչի հարցնում ենք «տարածքներ կարգավիճակի դիմաց» տարբերակն ընդունելի՞ է, թե՞ ոչ»,–նշեց վարչապետը։
Այդ հարցը, Փաշինյանի դիտարկմամբ, նախ պետք է ուղղել Ադրբեջանի ղեկավարներին։
«Ինչո՞ւ ենք մենք ուզում քննարկել մեր պատրաստակամությունը փոխզիջման գնալու այն դեպքում, երբ Ադրբեջանը փոխզիջման մասին չի էլ խոսում»,– ասաց նա։
Վարչապետը նաև նշեց, որ վերջին օրերին հանդիպել է ՀՀ առաջին նախագահ Լևոն Տեր– Պետրոսյանի հետ` վերջինիս նախաձեռնությամբ։
Հանդիպման հիմնական թեման եղել է ԼՂ հակամարտությունը։ «Լևոն Տեր–Պետրոսյանը ցանկություն էր հայտնել ինձ որոշ տեղեկություններ փոխանցել, որոնք, նրա կարծիքով, ինձ կարող էին անհայտ լինել։ Չնայած պիտի ասեմ, որ նրա հայտնած տեղեկություններն ինձ հայտնի էին»,– ասաց Փաշինյանը։
Ինչ վերաբերում է բանակցություններում Արցախի ներգրավվածությանը, ՀՀ վարչապետը փաստեց` ԵԱՀԿ ՄԽ բոլոր աշխատանքային փաստաթղթերում արձանագրված է` առանց Արցախի ժողովրդի մասնակցության Արցախի հարցի լուծում չի լինելու։
«Մեզ համար անընդունելի է ագրեսիվ ու ռազմաշունչ հռետորաբանությունը, որ վարում է Ադրբեջանը և մենք համանախագահներին պարբերաբար հայտարարում ենք, որ պատրաստ ենք կարգավորման, բայց դրա համար անհրաժեշտ է վստահության մթնոլորտ, որը խաթարում է Ադրբեջանը։ Դուք չեք տեսնի Հայաստանի կողմից այդ մթնոլորտը խաթարող որևէ քայլ»– ասաց նա` կարծիք հայտնելով, որ Արցախում լարված մթնոլորտ ստեղծելով` այդ երկրի իշխանությունները փորձում են ժողովրդի ուշադրությունը շեղել երկրում առկա խնդիրներից` սոցիալ–տնտեսական վիճակից ու կոռուպցիայից։
ՀՀ վարչապետը նաև նշեց, որ ինքը պատրաստ է հանդիպել Ադրբեջանի նախագահի հետ` հակամարտության լուծման ուղիները քննարկելու համար։
