ԵՐԵՎԱՆ, 18 հուլիսի — Sputnik. Հայաստանի հարավում մայրուղու մի հատված կարող է վճարովի դառնալ։ Այդ մասին չորեքշաբթի հայտարարեց Հայաստանի տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը։
Խոսքը, մասնավորապես, Սիսիան–Քաջարան հատվածի մասին է։ Հիմա այն անցնում է Զանգեզուրի և Բարգուշատի լեռներով և հարյուրավոր շրջադարձներ անում։
Ճանապարհի երկարությունը 130 կմ է, այն անցնելու համար պահանջվում է երկուսուկես ժամ։ Նոր ճանապարհը կլինի 70 կմ, իսկ շրջադարձները՝ զգալիորեն քիչ։
Նախկին հաշվարկներով՝ այս հատվածում ծրագրվում է կառուցել 27 կամուրջ և 9 թունել։ Դրանք ուզում են վճարովի դարձնել, իսկ գործող ճանապարհը կթողնեն` որպես անվճար այլընտրանք։
Շինարարներին ցանկանում են որոշել մրցույթով. կընտրեն նրան, ով աշխատանքի պատշաճ որակի դեպքում կբավարարվի մեքենաների անցնելու համար նվազագույն վճարով։
«Մենք կկողմնորոշվենք այն սակագնով, որը շատ չի լինի վառելիքի և ավտոմեքենայի ամորտիզացիայի ծախսերից։ Ուղևորատար և բեռնատար մեքենաների համար այդ կողմնորոշիչները մենք ցույց կտանք մրցույթի մասնակիցներին», – ասաց նախարարը Sputnik Արմենիայի թղթակցի հետ զրույցում։
Նրա խոսքով` շինարարությամբ արդեն հետաքրքրվել են մի քանի ընկերություններ Արևմտյան Եվրոպայից, Չինաստանից և Ռուսաստանից։
Հայաստանի հարավում գտնվող այդ լեռնային հատվածն ամենաբարդն է թե՛ հայ, թե՛ իրանցի վարորդների համար։
Սիսիան–Քաջարան հատվածը պետք է դառնա Հյուսիս-հարավ տրանսպորտային միջանցքի մասը` Հայաստանի իրանական սահմանից մինչև վրացական։ Այն կկրճատի ճանապարհը 556 կիլոմետրից հասցնելով 490-ի։ Ճանապարհի արժեքը սկզբում գնահատվել է 960 մլն դոլար, իսկ հիմա` մեկ միլիարդից ավելի։ Հիմնական վարկատուն Ասիական զարգացման բանկն է, մյուս վարկատուները` Եվրոպական ներդրումային բանկը և Եվրասիական զարգացման բանկը։ Առայժմ ֆինանսավորում են գտել 160 կմ–ի համար։
