ԵՐԵՎԱՆ, 17 հուլիսի — Sputnik. ՀՀ վարչապետի աշխատակազմի գործերի կառավարիչ Գևորգ Աճեմյանը ցանկանում է ազատվել աշխատանքից։ Ֆեյսբուքյան իր էջում նա գրել է, որ դիմում է ներկայացրել` զբաղեցրած պաշտոնից ազատվելու վերաբերյալ:
«Սիրելի ընկերներ, այսօր հրաժարականի դիմում եմ ներկայացրել վարչապետի աշխատակազմի գործերի կառավարչի պաշտոնից։ Ուրախ եմ, որ լավ թիմում եմ աշխատել։ Չեմ կարծում, թե կրոնական հայացքներս, առաջին նախագահի հասցեին արած արտահայտությունս, «Աշտարակ կաթի» և թերթեր չգնելու պատմությունները, որոնք հասարակական հնչեղություն ստացան, իրենց պատշաճ բացատրությունները չեն ստացել իմ կողմից։ Բայց և այնպես, բոլորս պետք է հաշվի նստենք որոշակի իրողությունների հետ և իրականությանը ճակատ առ ճակատ հանդիպենք։ Իմ աջակցությունն եմ հայտնում ներկայիս գործադիր իշխանությանը։ Ուժերիս ներածին չափով օգնական եմ լինելու նրան։ Լավ մնացեք…
Հ.Գ. խղճիս և Աստծո առաջ ուղիղ եմ»,–գրել է Աճեմյանը:
Հիշեցնենք, որ մամուլում և սոցիալական ցանցերում վերջերս տեղեկություն հայտնվեց, որ Գևորգ Աճեմյանը հարում է Կյանքի խոսք աղանդին։ Նա հաստատեց այս ինֆորմացիան, ինչը սոցիալական ցանցերում բուռն քննարկման առիթ դարձավ։ Գևորգ Աճեմյանը սոցիալական ցանցում նաև վիրավորական էր արտահայտվել ՀՀ 1–ին նախագահ Լևոն Տեր–Պետրոսյանի հասցեին։
