ԵՐԵՎԱՆ, 17 հուլիսի — Sputnik. Վարչապետը և կառավարությունն ակտիվ են սոցիալական ցանցերում, և դա ճիշտ որոշում է, կարծում է Հայաստանի նախագահ Արմեն Սարգսյանը։ Այդ մասին նա ասաց Sputnik Արմենիային տված բացառիկ հարցազրույցում։
«Առաջին հերթին, սոցիալական ցանցերը մեր ժամանակի բացարձակ իրականությունն են։ Այն քաղաքական գործիչները, որոնք հասկացել են աշխարհի զարգացման ուղղությունը, առավելություն կունենան։ Մեր վարչապետն ու կառավարության անդամները օգտագործում են սոցիալական ցանցերը, և ես դա ճիշտ եմ համարում. Ժողովուրդը պետք է իմանա` ինչու է կայացվել այս կամ այն որոշումը», — ասաց Սարգսյանը։
Նրա խոսքով` խորհրդարանական հանրապետության նախագահը կառավարչական գործառույթ չունի, և իր գործողությունների իմաստը ամեն օր ժողովրդին բացատրելու անհրաժեշտություն չկա։ Ուստի տվյալ փուլում Սարգսյանը սոցիալական ցանցերում էջեր չունի, դրա կարիքն ուղղակի չի զգում։
Նա նշեց, որ սահմանադրական բարեփոխումից հետո Հայաստանում դեռ պետք է սովորել ապրել խորհրդարանական հանրապետության պայմաններում։
«Մենք չունենք խորհրդարանական հանրապետության ավանդույթներ, դրանք պետք է ստեղծել, սովորել այն երկրներից, որտեղ կառավարման նման ձևը վաղուց է գործում», — նշեց նախագահը։
Նա խոստովանեց, որ մինչև հիմա էլ հետաքրքրված է տեսական ֆիզիկայով, որով զբաղվել է քաղաքականություն մտնելուց առաջ։
«Այն ոլորտը, որով ես զբաղվել եմ, հարաբերականության տեսությունը, տիեզերագիտությունը, ռելյատիվիստական աստղաֆիզիկան, տիեզերքի, աշխարհի ճանաչումն է, և գիտական ճանաչման միջոցով մենք ավելի ենք մոտենում ճշմարտությանը և Աստծուն ըմբռնելուն։ Որքան խորն ենք ճանաչում ֆիզիկայի օրենքները, այնքան հաճախ ենք բացահայտում բացարձակ պարզությունը և բացարձակ գեղեցկությունը», — ասաց Սարգսյանը։
Նա բացատրեց, որ հենց գիտությունն է իրեն նվիրել մտածողության դիսցիպլին, առողջ բանականություն և տրամաբանություն։
