ԵՐԵՎԱՆ, 16 հուլիսի — Sputnik. Եվրամիության երկրների ղեկավարները լուրջ են ընդունել Նիկոլ Փաշինյանի` Արցախի մասին ասածը։ Այս մասին այսօր լրագրողների հետ զրույցում ասաց Հայաստանում ԵՄ դեսպան Պյոտր Սվիտալսկին` ավելացնելով, որ պետք է հնարավոր ամեն ինչ անել հակամարտության լարվածությունը նվազեցնելու համար։
Հակամարտությանն առնչվող հարցերը մանրամասն քննարկվել են Բրյուսելում ՆԱՏՕ-ի գագաթնաժողովի շրջանակում ՀՀ վարչապետ Նիկոլ Փաշինյանի ու եվրոպացի առաջնորդների հանդիպման ժամանակ։
«Մենք լսել ենք հայկական կողմի անհանգստությունը և կանենք ամեն բան, որ ադրբեջանական կողմին հասցնենք խաղաղության ու հանգստության մասին ուղերձը», — ասաց Սվիտալսկին։
Հիշեցնենք` Փաշինյանը Բրյուսելում հարցազրույց էր տվել Euronews հեռուստաընկերությանը և նշել, որ ադրբեջանական ագրեսիան ուղղված է ընդհանուր առմամբ ժողովրդավարության դեմ, քանի որ Հայաստանն այսօր իսկապես ժողովրդավարական երկիր է։
