ԵՐԵՎԱՆ, 13 հուլիսի — Sputnik. Հայաստանը Եվրամիության ֆինանսական աջակցության կարիքը չունի. երկրում կան հայտնի կոռուպցիոներներ, որոնց կարելի է մի լավ թափ տալ, ու նրանց գրպաններից մեծ գումար կթափվի։ Այս մասին Բրյուսելում ճեպազրույցի ժամանակ հայտնել է ՀՀ վարչապետ Նիկոլ Փաշինյանը։
Նա ավելացրել է, որ Հայաստանում ընթացող քաղաքական գործընթացները կախված չեն նյութական աջակցությունից։
«Կարծում եմ` բավականին արդյունավետ ենք պայքարում կոռուպցիայի դեմ։ Երբ ինչ-որ եվրոպական պաշտոնյա ասաց, որ պատրաստ են ինչ-որ մի ծրագրի շրջանակում ինչ-որ մի գումարի աջակցություն հատկացնել Հայաստանին, ես նրան տվեցի մի հայտնի կոռուպցիոների անուն, ասացի, որ նրան մի լավ թափ տանք, գրպաններից այդքան գումարը կթափվի, այնպես որ, այդ գումարը, եթե ուզում եք, դուք նեղ վիճակում եք, ձեզ պահեք, կծախսեք, մենք կգտնենք ներքին բարեփոխումների արդյունքում»,- ասել է վարչապետը:
Նա նշել է, որ Հայաստանում բավականին խոշոր կոռուպցիոներներ կան։
«Ու մեկը չէ։ Մենք այդ հնարավորությունը բաց չենք թողնի, նախկինին վերադարձ չի լինելու», — ավելացրել է վարչապետը։
Վարչապետն ընդգծել է, որ կոռուպցիայի դեմ պայքարը մեզ համար արտաքին քաղաքական սակարկության առարկա չի կարող դառնալ։
Նրա խոսքով` ՀՀ իշխանությունները կոռուպցիայի դեմ պայքարում են ոչ թե այն պատճառով, որ ԵՄ-ն է պահանջում, որ պայքարենք, այլ որովհետև ժողովուրդն է պահանջել:
Վարչապետը նշել է, որ պարբերաբար գործընկերներին արդիական հարց է ուղղում. ի՞նչ է եղել միլիոնավոր եվրոների հետ, որը մեր երկիր են ուղղվել վերջին 20 տարվա ընթացքում, ու որքանո՞վ է դա արդյունավետ եղել։
«Չեմ թաքցնի` վերջերս Եվրամիության ներկայացուցիչներից մեկը հարցրեց ինձ`ինչպե՞ս է ստացվել, որ Հայաստանում այդքան թաքնված կոռուպցիա կա։ Ես պատասխանեցի`կներեք, բայց պետք չէ ծաղրել մեզ. դուք շատ լավ գիտեիք կոռուպցիայի և այլ բաների մասին։ Սակայն, հավանաբար, Եվրամիությունն իր աշխարհաքաղաքական պատկերացումներն ու հաշվարկներն ուներ», — ընգծել է գործադիրի ղեկավարը։
Հիշեցնենք, որ հուլիսի 11-13-ը Նիկոլ Փաշինյանն աշխատանքային այցով Բելգիայի Թագավորությունում էր։ Այնտեղ նա հանդիպել է ԵՄ կառույցների ղեկավարների հետ, Հյուսիսատլանտյան դաշինքի գագաթաժողովի շրջանակում մասնակցել է Աֆղանստանում «Վճռական աջակցություն» առաքելությանը մասնակցող ՆԱՏՕ-ի անդամ և ոչ անդամ պետությունների և կառավարությունների ղեկավարների հանդիպմանը, որտեղ հանդես է եկել ելույթով։
