ԵՐԵՎԱՆ, 13 հուլիսի — Sputnik. Հայաստանի իշխանություններն ուզում են մինչև սեպտեմբեր ավարտին հասցնել ընտրական օրենսգրքի բարեփոխումները։ Այս մասին լրագրողներին ասաց Հայաստանի առաջին փոխվարչապետ Արարատ Միրզոյանը խորհրդարանում քննարկումների հերթական փուլից հետո։
Քննարկումներ են անցկացվում թե՛ խորհրդարանում (չորս խորհրդարանական խմբակցությունները), թե՛ կառավարությունում։ Քննարկումներում կներառվեն նաև արտախորհրդարանական ուժեր, ինչպես նաև քաղաքացիական հասարակության ներկայացուցիչներ։
Իշխանությունները ձգտում են փոխզիջման հասնել թեկուզ բարեփոխումների հիմնական առաջարկների շուրջ։ Բայց նույնիսկ այստեղ առայժմ համաձայնություն չկա։ Մասնավորապես, կուսակցություններն առայժմ չեն պայմանավորվել` նվազեցնել, թե ոչ խորհրդարան մտնելու անցողիկ շեմը (5 տոկոս կուսակցությունների համար, 7 տոկոս` դաշինքների), ինչպես նաև հրաժարվել տարածքային շրջաններից թեկնածուներ ընտրելուց կամ ամբողջությամբ անցնել հանրապետական ցուցակների։
«Կատարյալ տարբերակում, իհարկե, պետք է ունենանք մեկ նախագիծ՝ բոլորիս հետ համաձայնեցված, բոլորիս սրտով, որի առանձին կետերի հետ կապված, ինչ խոսք, կարող են տարբեր ուժեր ունենալ որոշակի վերապահում»,- ասաց Միրզոյանը։
Հիշեցնենք` Փաշինյանի կառավարությունը հայտարարել է, որ ցանկանում է տարվա ընթացքում արտահերթ խորհրդարանական ընտրություններ անցկացնել։ Արտահերթ ընտրություններին կողմ են նաև Գագիկ Ծառուկյանի կողմնակիցները։
Իշխանափոխությունից հետո կառավարությունն այլևս մեծամասնություն չունի խորհրդարանում։ ՀՀԿ-ն շարունակում է մնացել խոշորագույն խմբակցությունը, թեև նախկին իշխանության կուսակցությունն արդեն բացարձակ մեծամասնություն չունի (խմբակցությունից դուրս են եկել վեց պատգամավոր, և 58-ի փոխարեն այնտեղ մնացել են 52-ը)։
