ԵՐԵՎԱՆ, 12 հուլիսի — Sputnik. Սեպտեմբերին Փարիզում Թումո ստեղծարար տեխնոլոգիաների կենտրոն կբացվի, այսօր հրավիրված մամուլի ասուլիսի ժամանակ ասաց Հայաստանում Ֆրանսիայի արտակարգ և լիազոր դեսպան Ժոնաթան Լաքոտը։
Նրա կարծիքով` Երևանում Ֆրանկաֆոնիայի գագաթաժողովի մասնակիցներն այս տարվա աշնանը կհիանան այն հիանալի, փայլուն ձեռքբերումներով, որոնք արձանագրում է Հայաստանում ՏՏ ոլորտը։
«Նրանք իսկապես հաճելիորեն կզարմանան», – ասաց Լաքոտը։
Նրա խոսքով` Ֆրանկաֆոնիայի գագաթաժողովի շրջանակներում կազմակերպվող բիզնես ֆորումի շնորհիվ ներդրողների և գործարարների ցանց է ստեղծվելու, որոնց համար առաջնային ոլորտ լինելու է տեղեկատվական տեխնոլոգիաները։
Նման փոխգործակցության կարևոր օրինակ է այն, որ սեպտեմբերին Փարիզում նախատեսում են «Թումո» բացել։
«Թումո կա Երևանում, շուտով կլինի Մասիսում, Թումո կա Բեյրութում, ևս մեկը Տիրանայում։ Եվս մեկը Փարիզում կբացվի», – ասաց Լաքոտը։
Նա նշեց, որ այդ քաղաքները կապված են Ֆրանկաֆոնիայի հետ, և կենտրոններն իրենց դերը կունենան։ Լաքոտի կարծիքով` գագաթաժողովից հետո դրա մի շարք մասնակիցներ կցանկանան իրենց երկրում «Թումո» կենտրոններ բացել։
Թումո ստեղծարար տեխնոլոգիաների կենտրոնը նորարար կենտրոն է, բաց մեդիա–ստուդիայով, այն Երևանում բացվել է 2011 թվականի օգոստոսին։ Կենտրոնը 12-18 տարեկան դեռահասների համար ՏՏ ոլորտի պրակտիկ արտադպրոցական ծրագիր է ներկայացնում։ Ավելի ուշ նման կենտրոններ բացվեցին Գյումրիում, Դիլիջանում և Ստեփանակերտում։
