ԵՐԵՎԱՆ, 11 հուլիսի — Sputnik. ՀՀ կառավարությունն առաջարկում է քաղաքացիներին ազատել մինչև 2017թ-ի դեկտեմբերի 31-ը կիրառված ու չվճարված վարչական իրավախախտումների համար նախատեսված տուգանքներից: Համաներման մասին նախագիծը ԱԺ արտահերթ նիստում ներկայացնելով` արդարադատության նախարար Արտակ Զեյնալյանը հայտնեց, որ նախագիծը վերաբերում է 13.7 մլրդ դրամի տուգանքների ու տույժերի և տարածվելու է 150 000 մարդու վրա:
«Նրանք, ովքեր մինչև 2017թ-ի դեկտեմբերի 31-ը չեն կարողացել տուգանքը վճարել, նրանց հաշիվների վրա կալանք է կիրառվել, և նրանք չեն կարողանում օգտվել այլ ծառայություններից, մասնավորապես` վարկեր ստանալ և այլն: Մենք կարծում ենք, որ այս համաներումը բավականին կբարելավի մեր քաղաքացիների սոցիալ-տնտեսական և բարոյահոգեբանական վիճակը»,- ասաց Զեյնալյանը:
Նախագծով չվճարված տուգանքներից ազատվում են նշված ժամանակահատվածում տուգանված բոլոր անձինք` բացառությամբ այն դեպքերի, եթե Ճանապարհային երթևեկության տվյալ խախտման փաստով հարուցվել է քրեական վարույթ և գործը չի կարճվել անմեղության հիմքով:
Արտակ Զեյնալյանը նշեց այն իրավախախտումները, որոնց վրա չի տարածվի օրենքը։ Թվարկվածների մեջ ներառված չեն առանց համապատասխան թույլտվության տրանսպորտային միջոցի վրա կարմիր ու կապույտ լուսային ազդանշանով առկայծող փարոսիկներ, հատուկ ձայնային ազդանշաններ արձակելու սարքավորումներ տեղադրելը, ինչպես նաև օպերատիվ ծառայությունների տրանսպորտային միջոցների համար նախատեսված գունածածկապատկերներ օգտագործելը։ Առանց հաշվառման համարանիշի կեղծված կամ փոխարինված հաշվառման համարանիշով տրանսպորտային միջոցներ վարելը։ Տրանսպորտային միջոցը տնօրինողի կողմից հաշվառման համարանիշն այլ անձին հանձնելը։ Ոչ սթափ վիճակում մեքենա վարելը, ոստիկանի «կանգ առ» ազդանշանին չենթարկվելը, առանց ԱՊՊԱ կտրոնը փակցնելու երթևեկելը:
