ԵՐԵՎԱՆ, 11 հուլիսի — Sputnik. «Մարտիկ» հիմնադրամի ղեկավար և հիմնադիր Արթուր Աղաբեկյանը միայն հանդես է եկել բարձրագոչ հայտարարություններով, բայց իրականում կազմակերպությունը ոչ մի զգալի արդյունք չի տվել և ոչինչ չի արել երկրի համար։ Այդ մասին Sputnik Արմենիային տված հարցազրույցում ասաց Երևանի Ավագանու խորհրդում «Ելք» խմբակցության անդամ Անահիտ Բախշյանը։
Բախշյանի խոսքով` նա դիմել է հիմնադրամ` խնդրելով Գերմանիայում կազմակերպել եղբայրների բուժումը, որոնք տուժել են 2016թ–ի ապրիլյան պատերազմի ժամանակ, բայց ոչ մի աջակցություն չի ստացել։ Ավելի ուշ Բախշյանը հաշվետվություն է պահանջել հիմնադրամի գործունեության մասին, սակայն այնտեղ նրան պատասխանել են, որ նա «Մարտիկի» անդամ չէ և նրան չեն կարող տրամադրել պահանջվող փաստաթղթերը։
Անահիտ Բախշյանը դիմել է հիմնադրամ` խնդրելով իրեն ընդունել իրենց շարքերը։ Արդյունքում նա պարզել է, որ կազմակերպության հաշվեհամարը գրանցված է «Հայխնայբանկում» (2006թ–ին վերանվանվել է «ՎՏԲ Հայաստան բանկ` խմբ.»), որը 2000–ականներից չի գործում։ Այնուհետև բարձրացրած աղմուկից հետո նշվել է մեկ այլ հաշվեհամար։
«Իմ դիմումի հիման վրա նախապատրաստվել են քրեական գործի նյութեր, այն հասել է Քննչական մարմին։ Ես արդեն երկու տարի է ասում եմ այդ մասին։ Դիմել եմ դատախազություն` այդ շրջանում գործող նախագահին։ Հիմա իրավիճակը փոխվել է, ինչը թույլ է տվել փաստաթղթերն ուղարկել փորձաքննության, բոլոր ապացույցները կուսումնասիրվեն», – ասաց Բախշյանը։
«Ելք» խմբակցության անդամը բազմաթիվ հարցեր ունի` կապված «Մարտիկ» հիմնադրամի հետ։ Նա քննիչներին հանձնել է դրանց մի մասը միայն։
«Հիմա կարող եմ տրամադրել այն ամենը, ինչ ունեմ», – ասաց նա` առաջարկելով. «Մենք տեսնում ենք, թե ինչ է տեղի ունենում հիմա։ Ինչին դիպչում ենք, ամենուրեք խնդիրներ են։ Նկատի ունեմ այն, ինչը կապված է եղել քաղաքական վերնախավի նախկին ներկայացուցիչների հետ», – հավելեց Sputnik Արմենիայի զրուցակիցը` դա անվանելով անօրինականություն։
Բախշյանը նշեց, որ իր համար ամենավիրավորականն այն է, որ երբ նա ծանոթացել է հիմնադրամի ղեկավարների հայտարարությունների, պատմության հետ, շատ է ուրախացրել։ Սակայն ավելի ուշ պատկերը փոխվել է, եղել են ամպագոռգոռ հայտարարություններ, հիմնադրամի հիմնադիր Արթուր Աղաբեկյանը պատմել է, որ բազմաթիվ խնդիրներ է լուծելու, իսկ գործնականում արդյունքներ չեն եղել։
Հիմա Բախշյանը Աղաբեկյանին համարում է իր թշնամին. «Ոչ մի անձնական բան, պատճառը նրա անգործունեությունն է», – նշեց նա։
Sputnik Արմենիան փորձեց կապ հաստատել նաև «Մարտիկ» հիմնադրամի տնօրինության հետ` նրանց տեսակետը ևս ներկայացնելու համար, բայց մեր զանգերին չպատասխանեցին։
Հիշեցնենք, որ Հայաստանի Քննչական կոմիտեն քրեական գործ է հարուցել` կապված «Մարտիկ» հիմնադրամում չարաշահումների հետ, որի հիմքում ընկած են Անահիտ Բախշյանի ցուցմունքները։
Պարզվել է, որ 2008-17թթ–ին հիմնադրամի գործադիր տնօրենի կատարած վարչական ծախսերը 10 տոկոսով գերազանցել են ընդհանուր ծախսերին։ Տարբերությունը կազմել է 26 191 377 դրամ։
Այսպիսով, խախտվել են հիմնադրամի կանոնադրության 5.5 կետի պահանջները, հասցվել է զգալի վնաս։
Հարուցվել է քրեական գործ Հայաստանի ՔՕ 214 հոդվածի 2–րդ մասով։
«Մարտիկ» հիմնադրամը ստեղծվել է 2002թ-ին։ Հիմնադրամի գործադիր տնօրենը Սեդրակ Սեդրակյանն է: Հիմնադրամի պաշտոնական կայքում հրապարակված տեղեկատվության համաձայն` հիմնադիրների թվում են Սերժ Ազատի Սարգսյանը, Արթուր Ալեքսանդրի Աղաբեկյանը։ Իսկ Վլադիմիր Գասպարյանը, Հայկ Հարությունյանը, Սաշա Սարգսյանը, Երվանդ Զաքարյանը, Աղվան Հովսեփյանը, Գագիկ Ծառուկյանն ու Ռոբերտ Նազարյանը կայքում ներկայացված են որպես քարոզիչներ։ Հիմնադրամի ֆինանսական միջոցները, կանոնադրության համաձայն, պետք է գոյանան տարբեր նվիրատվություններից և անդամավճարներից:
