ԵՐԵՎԱՆ, 11 հուլիսի – Sputnik. ԱԺ հանրապետական պատգամավոր, նախկին ոստիկանապետ Ալիկ Սարգսյանը վստահեցնում է` չարաշահումներ չի արել, օրենքի առաջ պատասխանելու պատճառ չունի: Այս մասին նա այսօր հայտարարեց ԱԺ-ում լրագրողների հետ զրույցում` անդրադառնալով Արարատի նախկին մարզպետի` իր հասցեին ուղղված մեղադրանքներին:
«Ես մաքուր եմ ապրել, ոչ մի չարաշահում չեմ արել, և իմ խիղճը հանգիստ է»,- հայտարարեց Սարգսյանը:
Իսկ ինչ վերաբերում է իր հսկայական կարողության մասին լուրերին, պատգամավորը վստահեցրեց` ամեն ինչի դիմաց ունի համապատասխան բացատրություն և արդարացում:
«Ցանկացած մարդ, Հայաստանի քաղաքացի սեփականություն ունենալու իրավունք ունի, Սահմանադրությունը կարդացեք: Ես կխոսեմ սեփականություն ունենալու տեսանկյունից և կհիմնավորեմ»,- լրագրողներին ասաց նախկին ոստիկանապետը` միաժամանակ հերքելով, որ ունի բենզալցակայաններ ու այլ բիզնեսներ:
Իսկ հարցին, թե ինչու հատկապես հիմա որոշեց դիմել իրավապահներին, Ալիկ Սարգսյանն արձագանքեց` իշխանություն է փոխվել:
«Մարդիկ վարկաբեկելու խնդիր ունեն, ես պարզ հայտարարում եմ, որ կորցնելու ոչինչ չունեմ, ավելի լավ է` իրեն վարկաբեկեմ: Դիմողը շատ փոքրիկ անձնավորություն չէ, չգիտեմ ինչ է՝ միաբջիջ մի մարդ է, որ ինձ փորձի վարկաբեկի, իմ ամբողջ տարիների վաստակը նսեմացնի, ոչ մեկն այս երկրում նման բան չի կարող անել»,- ասաց Ալիկ Սարգսյանը։
Սարգսյանը չցանկացավ հայտնել այն մարդու անունը, ում դեմ հաղորդում է ներկայացրել։ Փոխարենը խորհուրդ տվեց թերթ կարդալ` այդուհանդերձ չհերքելով, որ դա Արարատի նախկին մարզպետն է:
Հիշեցնենք` օրեր առաջ Հանրապետական խմբակցության պատգամավոր, նախկին ոստիկանապետ Ալիկ Սարգսյանը հանցագործության մասին հաղորդում էր ներկայացրել նախկին պաշտոնյաներից մեկի դեմ: Այլ մանրամասներ պաշտոնապես չհրապարակվեցին, բայց մամուլում տարածված լուրերի համաձայն` հաղորդումը վերաբերում էր Արարատի նախկին մարզպետ Վարդգես Հովակիմյանին, որն այդ պաշտոնում 2008թ-ին փոխարինել էր Ալիկ Սարգսյանին, երբ վերջինը նշանակվեց ՀՀ ոստիկանապետ:
Վարդգես Հովակիմյանին 2011 թվականին մեղադրանք է առաջադրվել պաշտոնեական լիազորությունները չարաշահելու, պաշտոնեական կեղծիքի դրդելու և պաշտոնեական անփութություն կատարելու համար: Այն ժամանակ Հովակիմյանը տարբեր առիթներով հայտարարել էր, թե այդ ամենի հետևում կանգնած է եղել Ալիկ Սարգսյանը:
Նշենք, որ մի քանի օր առաջ ԶԼՄ–ները հրապարակեցին 2008-2010թթ. Արարատի մարզպետի պաշտոնը զբաղեցրած Վարդգես Հովակիմյանի նամակը, որը նա ուղարկել է ՀՀԿ կենտրոնական գրասենյակ, իսկ պատճենը՝ նախկին ոստիկանապետ Ալիկ Սարգսյանին։ Ըստ հրապարակումների` Սարգսյանն այդ նամակը ստանալուց հետո է դիմել ՀՔԾ՝ բողոքելով, որ Հովակիմյանը փորձում է շանտաժի միջոցով գումար կորզել: Նա Սերժ Սարգսյանին ուղղված նամակում հայտնել է, որ
Ալիկ Սարգսյանը կաշառակեր է և ոստիկանի անունը արատավորող անձ։ Նա նաև հայտնել է, որ նախկին ոստիկանապետը կաշառք է վերցրել, որպեսզի ոմանց աշխատանքի ընդունի, բայց խոստումը չի կատարել։ Հովակիմյանը վստահեցրել է նաև, որ Սարգսյանը Արարատի մարզի ամենահարուստ մարդն է, և
դժվար է գտնել մեկ այլ մարդու, ով այդքան սեփականության վկայական ունենա՝ շենքեր, շինություններ, գյուղնշանակության հողեր, ավազի, տրավերտինի և այլ հանքավայրեր, խանութներ ու հասարակական սննդի օբյեկտներ:
