ԵՐԵՎԱՆ, 10 հուլիսի — Sputnik. Հուլիսի 14-ի դրությամբ հաշվարկվել ու վերականգնվել է 20 մլրդ 622 մլն դրամի վնաս կամ չվճարված հարկ, որը պետք է վճարվի:
Այս մասին այսօր կառավարության նիստի ժամանակ հայտարարեց ՀՀ վարչապետ Նիկոլ Փաշինյանը՝ հավելելով, որ խոսքը 42 մլն դոլարի մասին է:
«Մեր կառավարության ձևավորումից ի վեր Հայաստանում ակտիվ ընթանում է կոռուպցիայի, չարաշահումների և ստվերային տնտեսության դեմ պայքար: Ներկայացվածը շատ կարևոր ցուցանիշ է ու կարծում եմ, որ մենք այս ուղղությամբ աշխատանքը պետք է շարունակենք»,–ասաց վարչապետը` հիշեցնելով, որ 2 ամիսից կես ամիսն առնվազն ծախսվել է զուտ կազմակերպչական աշխատանքների վրա: Այսինքն` սա 1,5 ամսվա ցուցանիշ է:
Այն, որ բյուջեում այս պահի դրությամբ այս վերադարձված թիվը չի արտահայտվում, վարչապետը ոչ մի տարօրինակ բան չի տեսնում։ Նա խնդրեց ՊԵԿ նախագահ Դավիթ Անանյանին պարզաբանել, թե ինչու ավելի քան 20 մլրդ դրամից միայն 800 մլն դրամն է ներառված բյուջեում:
«Ըստ էության 20,622 մլրդ դրամը օր օրի փոփոխվում է, բարձրանալու միտում ունի: Այն 73 ընկերությունների վարքագծի արդյունք է: Մենք կարող ենք դա բաժանել երեք մասի: 800 մլն-ը մուտքագրվել է բյուջե, մոտ 12,7 մլրդ դրամը առաջադրվել է գանձման, իսկ 7 մլրդ դրամի կարգի թիվ նախնական հաշվարկներ են, որոնք փոփոխման ենթակա են, այսինքն` քննչական գործողությունների արդյունքում դրանք մեծանալու միտում ունեն:
Օրինակ, եթե «Նորֆոլկի» թեմայով ասում ենք, որ վերականգնվել է 2,5 մլրդ դրամ, մենք նկատի ունենք, որ «Նորֆոլկի» հաշվին մուտքագրվել է այդ գումարը, որը վերահսկվում է ԱԱԾ-ի ևւ ՊԵԿ-ի կողմից: Լուծարային ստուգման ակտը գրելուն պես ակտի հիման վրա գումարները կփոխանցվեն բյուջե: Երբ ասում ենք ունենք վերականգնում, դա դեռ չի նշանակում անմիջական մուտք պետական բյուջե: Մենք տվյալները կհրապարակենք մինչև հուլիսի 17-ը»,-տեղեկացրեց Դավիթ Անանյանը:
Նիկոլ Փաշինյանն էլ իր հերթին հիշեցրեց, որ եթե արձանագրվել է չվճարված հարկ, այդ ընկերության ներկայացուցիչները գումարը մուտք են արել իրենց իսկ ընկերության հաշիվ, որը կալանքի տակ է, այսինքն գտնվում է ԱԱԾ-ի վերահսկողության տակ: Ստուգումներից հետո այդ գումարը փաստացի կտեղափոխվի պետական բյուջե:
«Ես ուզում եմ լրատվամիջոցների ներկայացուցիչներին հանգստացնել, որ այդ ավելի քան 20 մլրդ դրամը ոչ մի տեղ չի կարող կորել, դրանք ամբողջը դե ֆակտո վերականգնված գումարներ են և ընթացակարգերի խնդիր է»,–վստահեցրեց ՀՀ վարչապետը:
Նա նաև նկատեց, որ սա վերաբերում է միայն հարկային պարտավորությունների մասով վերականգնված վնասին և չի վերաբերում յուրացումների, ապօրինի հարստացումների, այլ կոռուպցիոն երևույթների հետ կապված գործերին, որոնք նույնպես իրենց ծավալներով չափազանց մեծ են: Նիկոլ Փաշինյանը հույս հայտնեց, որ պետությանը հասցված վնասների վերականգնման պրոցեսը կշարունակվի, և կունենանք ավելի լավ արդյունքներ:
