ԵՐԵՎԱՆ, 9 հուլիսի — Sputnik. Թուրքիայում տեղի ունեցած պատահարի հետևանքով մահացել են 24 մարդ, հաղորդում է Anadolu գործակալությունը։
Գնացքը դուրս է եկել ռելսերից հուլիսի 8-ի երեկոյան Թուրքիայի արևմուտքում գտնվող Թեքիրդաղ նահանգում։ Երկրի փոխվարչապետ Ռեջեփ Աքդաղի խոսքով` դեպքի վայրում որոնողափրկարարական աշխատանքներն ավարտվել են հուլիսի 9-ի առավոտյան։
Աքդաղը նշել է, որ միջադեպի պատճառներն ուսումնասիրվում են։ Առողջապահության նախարար Ահմեդ Դեմիրջանը հաղորդել է, որ հիվանդանոցներ է տեղափոխվել 318 ուղևոր, որոնցից 124-ն անցնում է ստացիոնար բուժում։
Նախնական տվյալներով` մարդատար գնացքը ռելսերից դուրս է եկել հորդառատ անձրևի պատճառով, որը Թեքիրդաղի շրջանում քշել տարել է ռելսերի տակի հողը։
Վթարի պահին գնացքում եղել են 362 ուղևոր և երկաթուղային ծառայության 6 աշխատակից։
