ԵՐԵՎԱՆ, 7 հուլիսի — Sputnik, Նելի Դանիելյան. 8-րդ դասարանցի Կարինե Ավագյանը որոշել է ուսումը շարունակել Երևանի Քանաքեռ թաղամասում կառուցվող Չինական դպրոցում։ Կարինեին հանդիպեցինք այն պահին, երբ նա մայրիկի հետ եկել էր դպրոց ընդունվելու համար անհրաժեշտ փաստաթղթերը հանձնելու։
Չինաստանի մասին Կարինեի գիտելիքները սահմանափակվում են Չինական մեծ պատի, ազգային կերակուրների մասին տեղեկություններով։ Աղջիկը չինարեն ոչ մի բառ չգիտի, բայց ուզում է սովորել։ Նախկին դասընկերներից բաժանվելու միտքը նրան չի մտահոգում։
«Մեր դասարանից 2 հոգի էլ են Չինական դպրոց ընդունվելու հայտ ներկայացրել»,- Sputnik Արմենիային ասաց նա։
Կարինեից ու նրա դասընկերներից բացի, Չինական դպրոցում սովորելու հայտ են ներկայացրել ևս ավելի քան 500 աշակերտ, ևս 4-5 ծնող էլ այդ պահին դիմումներ էին լրացնում։
Երևանցի Վահագն Չախոյանը միանգամից երեք դիմում էր լրացնում իր երեք երեխաների համար։
«Տղաներս 5 և 7, աղջիկս 9-րդ դասարանցի են։ Դպրոցը մեր տանը մոտ է, հարմար է։ Բացի այդ, վաղ հասակից չինարեն սովորելն ու Չինաստանի հետ կապ ունենալը հետագայում կարող է օգնել նրանց»,- ասաց նա։
Մեր այցելության պահին 450 աշակերտի համար նախատեսված դպրոցն արդեն 534 դիմում էր ստացել։ Չինական դպրոցի նկատմամբ նման հետաքրքրությունը զարմացրել է անգամ դիմումներն ընդունող Կոնֆուցիոսի ինստիտուտի տնօրեն Գոռ Սարգսյանին։
Նա դիմումատու ծնողներին խորհուրդ է տալիս երեխաներին առայժմ չհանել իրենց դպրոցներից, քանի որ դիմորդների թվից դատելով` ընդունվելու են ոչ բոլորը։
«Դիմորդներն արդեն իսկ շատ են, ընտրություն լինելու է, չգիտեմ` ինչ ձևաչափով կանցկացվի, դեռ չի քննարկվել, չի որոշվել։ Բայց ընտրություն լինելու է»,- ասաց նա։
Չնայած դիմողների ակտիվությանը, չինական դպրոցի շենքի շինարարությունը դեռ չի ավարտվել։ Մեր այցելության պահին այստեղ չինացի շինարարներն ակտիվ աշխատում էին։ Շինաշխատանքների ղեկավարները մեզ վստահեցրին, որ աշխատանքները հուլիսի 15-ին կավարտվեն։
Նոր դպրոցը, ուսումնական մասնաշենքից բացի, ունենալու է նաև մեծ մարզասրահ ու հյուրատուն, որտեղ բնակվելու են ոչ միայն Չինաստանից ժամանած դասավանդող մասնագետները, այլ նաև աշակերտները, եթե անհրաժեշտություն լինի։
Հիշեցնենք, որ ՀՀ կրթության և գիտության նախարարության հայտարարության համաձայն` չինական ուսուցմամբ դպրոցն ընդգրկելու է 5-ից 12-րդ դասարանները։ Ուսուցման հիմնական լեզուն դպրոցում լինելու է հայերենը։ Բոլոր դասարաններում շաբաթական 3 դասաժամ տրամադրվելու է չինարենի ուսուցմանը։
Դպրոցի ստեղծման շուրջ չինական կողմի հետ համաձայնագիրը ՀՀ կառավարությունը ստորագրել էր 2012թ-ին։
Դրա համաձայն` Չինաստանը շուրջ 8 մլն դոլարի ներդրում է կատարել դպրոցի կառուցման համար։ Կառավարության որոշմամբ` Հայաստանի Հանրապետությունն անհատույց չինական կողմին էր տրամադրել Երևանի Զ.Սարկավագի 14 հասցեում գտնվող Հ.Գյուլիքեխվյանի անվան թիվ 103 ավագ դպրոցի շենքն ու կից շինությունները և 1,4 հա հողամասը:
Դպրոցի շինարարությունը մեկնարկել է 2015-ին։
