ԵՐԵՎԱՆ, 6 հուլիսի — Sputnik. ՀՀ նախագահ Արմեն Սարգսյանի անձնական լուսանկարիչ Դավիթ Հակոբյանը հյուրընկալվել է Ղազախստանում հայտնի «Түнгі студия» հաղորդմանը։
Շոուի ընթացքում նա խոսել է Ղազախստանի նախագահի հայտնի լուսանկարի մասին, որը Նուրսուլթան Նազարբաևի այցեքարտն է դարձել։
«Ես նախատեսել էի լուսանկարել մեր նախագահին. նախապես մտածել էի` որտեղ և ինչպես կանգնել։ Սակայն առաջինը դուրս եկավ Նուրսուլթան Նազարբաևը ու լուսանկարում ինքը միայնակ արտացոլվեց», – պատմել է Հակոբյանը։
Լուսանկարիչը խոսել է նաև իր մասնագիտական գործունեության մասին։
«2002 թվականից լուսանկարչությամբ եմ զբաղվում։ Լրագրության ոլորտում եմ 2007 թ.–ից, իսկ 2010–ին դարձա նախագահի լուսանկարիչը… Մինչ այդ ֆոտոգործակալություններում էի աշխատում։ 24 տարեկանում դարձա նախագահի անձնական լուսանկարիչը», – նշել է նա։
Դավիթը պատմել է նաև նախագահի, այն ժամանակ` դեռ Սերժ Սարգսյանի անձնական լուսնկարչի պաշտոնում իր առաջին օրերի մասին։
«Մի փոքր հուզում էի, երբ մենակ էինք մնում։ Ամաչում էի ասել` այսպես կանգնեք, այսպես արեք», – անկեղծացել է Հակոբյանը։
Հաղորդավարը` շոումեն Կայրատ Ադիլգերեյը հարցրել է լուսնկարչին` ինչ դերակատարություն է ունեցել Դավիթի կյանքում Ղազախստանի նախագահի այդ լուսանկարը։
«Նուրսուլթան Նազարբաևի լուսանկարն ինձ համար թալիսման է դարձել։ Դրանից հետո հայտնի դարձա Ղազախստանում և ոչ միայն… Դրանից հետո գործերս լավ են գնում», – նշել է Հակոբյանը։
Հակոբյանը գովել է Ղազախստանի նախագահին` միջազգային գիտաժողովների ու միջոցառումների կազմակերպման գործում Աստանայի ակտիվ մասնակցության համար։ Լուսանկարչի խոսքով` ամեն գալուց մայրաքաղաքն էլ ավելի գեղեցիկ է լինում ու դա հենց Նուրսուլթան Նազարբաևի վաստակն է։
Հաղորդավարի խոսքով` Դավիթի արած այդ լուսանկարը հայ–ղազախական բարեկամության ևս մեկ կապող օղակ է դարձել։ Հակոբյանն էլ նշել է, որ հայերն ու ղազախները բարեկամական ու եղբայրական ժողովուրդներ են, հայերը Ղազախստանում իրենց լավ են զգում։
Նա խոսել է նաև իր երազանքի մասին. կցանկանար տեսնել իր լուսանկարը Times ամսագրի շապիկին։
«Түнгі студия»–ն երգիծական ծրագիր է, որի նախատիպն են late-night talk show արևմտյան հաղորդումները։ Այնտեղ հյուրընկալում են հայտնի անձինք քաղաքականության, սպորտի ու շոու բիզնեսի ոլորտից։ 2016 թվականին նոյեմբերին նախագծի հյուրն եղել` Նուրսուլթան Նազարբաևը։
